"مش مخطوبة" ابنة خالة فتاة المعادي تكشف تفاصيل وفاتها وتكذب السوشيال ميديا

أبدت رنا عبد الوهاب "بنت خالة" مريم "فتاة المعادي" التي لقيت مصرعها بطريقة مؤلمة في وقت سابق، غضبها الشديد من تناول العديد من الصفحات بمختلف مواقع التواصل الإجتماعي، معلومات مغلوطة عن الضحية، أو الواقعة.

وكتبت رنا عبد الوهاب عبر صفحتها الشخصية بموقع "فيس بوك"، "اتمني الموضوع الصحيح يتشير ويوصل لأكبر عدد من الناس، مريم الله يرحمها تكون من عيلتي، وحقيقي الكلام والتأليف كتروا أوي وكل واحد يزود كلمة من عنده أو توقع لا يمد للحادث بأي صلة، وللأسف الكتير مش مقدر مشاعر أهلها اللي بيشوفوا الكلام دا".

وأضافت، "مريم كان عندها ٢٤ سنة بتشتغل في البنك الأهلي ومكنتش مخطوبة وبتجهز لفرحها ولا أي حاجة من الكلام دا فبلاش تزودوا صعبنيات في الموضوع لأنه اصلا مش ناقص".

وتابعت "واللي حصل كالتالي، مريم كانت رجعة من شغلها يوم التلات بليل والشارع اللي كانت ماشية فيه دا هو طريق بيتها، كانت بتتكلم مع واحدة صحبتها في الموبيل وفجأة صاحبتها سمعت مريم بتصرخ والخط قطع بعدها، ٣ حيوانات لا يقال عليهم غير كدا في الغابة اللي بقينا عايشين فيها راكبين ميكروباص تحرشوا بيها لفظيا وكانوا بيسرقوا شنطتها، مريم كانت لبسة شنطة ظهر وواحد من الحيوانات دول فضل يشد في الشنطة من علي ظهرها والعربية ماشية فدماغها اتخبطت، وطبعا فضل هو يشد في الشنطة وهي بتحاول تقاوم وكل دا والعربية ماشية واتسحلت معاهم لمسافة بطريقة مؤلمة، وبعد ما الناس بدأت تجري ورا الميكروباص الحيوان سبها فوقعت علي الأرض علي ضهرها فبالتالي دماغها اتخبطت في الأرض بردو والخبطات دي أوددت بحياتها، الناس اتلموا حوليها وهي علي الأرض بتنزف بيكلموا الإسعاف اللي كالعادة جت بعد ساعة من الحادثة كانت يا حبيبتي خلاص اتوفت".

واصلت رنا عبد الوهاب حديثها "ومفيش هناك أي شاهد عيان شرح الحادثة بشكل صحيح زي ما بان في كاميرات المراقبة غير شخص واحد فقط، وقدم شهادته وكتر الف خيره فضل موجود لحد ما جت الإسعاف والبوليس، وللتوضيح الراجل اللي كان جنبها مش باباها، باباها صحبتها كلمته قلتله أنها كانت بتكلمها وفجأة صرخت والخط قطع وبعدها أهلها عرفوا بعد ما الجثمان وصل المستشفي".

واختتمت، "مريم مضربتش بالمطواة ولا أي حاجة من الكلام الكتير الغلط اللي منشور علي صفح كتير والعربية مرجعتش وداست عليها ولا كل الكلام دا، اتمني الكل يراعي مشاعر أهلها للي هيقروا الكلام اللي انتم كتبينه، وربنا ينتقم منهم يارب وحسبي الله ونعم الوكيل فيهم وفي أمثلهم، الحمد لله تم القبض علي واحد منهم، واتمني يطبقوا عليهم اشد عقوبة، ربنا يرحمك يا مريم ويغفرلك ويسكنك فسيح جناته ويصبر قلب باباكي ومامتك وكل حبايبك يا حبيبتي، وقطع لسان اللي يقول في حقك أي كلمة وحشة أو ينتقدك".