الأرقام مبتكدبش.. موازنة التعليم ارتفعت لـ10 أضعاف (فيديو)
الأحد 10/أكتوبر/2021 - 09:27 م
أشادت الإعلامية بسمة وهبة، بالإنجازات التي تقطعها الدولة المصرية لتطوير منظومة التعليم، مضيفة: "فى عالم السياسة والإقتصاد وإدارة الدول الأرقام مبتكدبش فلما أرجوزات الإعلام الإخواني يقولوا لك التعليم العالى فاشل قوله تعالى، إن مصر قبل 2014 كانت تصرف على التعليم العالى والبحث العلمى حوالى 12 مليار جنيه النهاردة الرقم المخصص فى موازنة الدولة للتعليم العالى والبحث العلمى 182 مليار جنيه فاهم يعنى إيه؟! شايفين الرقم، يعنى مش الضعف ولا الضعفين ولا 3 أضعاف، لأ ده أكتر من 10 أضعاف".
قالت خلال برنامجها "90 دقيقة" المذاع على شاشة "المحور": "اللى حصل فى التعليم العالى والجامعات خلال الكام سنة اللى فاتت كبير، سواء من حيث الشكل أو المضمون، يعنى مصر زودت 4 جامعات حكومية جديدة مجانية، مصر بتعمل جامعات أهليه خلاص بدأت تشتغل وتعمل توازن بين التكلفة المادية البسيطة وبين مميزات التعليم الخاص والمتطور، ومصر دخلت برامج تعليمية جديدة فى تعليمها، والنتيجة كانت سريعة، يعنى التصنيفات الدولية بتاعة الجامعات اللى كنا بنزعل زمان عشان مافيهاش جامعات مصرية، دلوقتى هتلاقى كل سنة عدد الجامعات المصرية فيها بيزيد، وطالما بنزيد يبقى بنطلع لقدام".
واستطردت: "فى تصنيف شنجهاى أنت بقى عندك 16 جامعة مصرية، مش بس كده دى اتقدمت في المراكز ضمن أفضل 500 جامعة عالميا، وفى تصنيف التايمز البريطانى بقى عندك 20 جامعة مصرية ، وفى تصنيف US News الأمريكي دخل 14 جامعة مصرية، ووده بيثبت لنا إن الكداب الإخوانى وكدب المنظراتية على السوشيال ميديا هيفضل طول عمره فاشل فشل كبير، زى تجربتهم التعليمية الفاشلة بالضبط".
