بعد واقعة "الموظف المنتحر".. سيدة تستغيث بعد فصلها تعسفيًا من "القرية الفرعونية" (صور)

لم يمضي سوى أسبوع على واقعة انتحار الموظف نور الدين صاحب الـ45 عامًا قفزًا من الطابق الثالث بمحل عمله بمقر شركة "تيليبرفورمانس مصر" بالتجمع الخامس بسبب إهانة مديره له، لتحدث الواقعة ضجة كبيرة وتكشف الستار عن عن وقائع مختلف تجد الصور الحقيقية للتعسف ضد الموظفين. 

وكشفت سيدة تدعى "راندا الشيخ" تفاصيل فصلها من مقر عملها بالقرية الفرعونية بالجيزة؛ على خلفية تعليق أشادت به بـ"احتفالية طريق الكباش"، ومنعها من الدخول إلى مقر عملها.

وقالت "راندا" عبر حسابها الشخصي بموقع "فيس بوك": "بمناسبة انتحار موظف شركة التجمع الخامس.. تخيلوا إن مدير القرية الفرعونية قرر فصلى تعسفي بعد خدمتي للقرية 6 سنين كمديرة العلاقات العامة والإعلام بالقرية وكنت دايما بحاول أظهر مجهود القرية إعلاميا فالصحافة والقنوات وأعمل كل الأفكار اللي ممكن تساعد الدولة في تنشيط السياحة آخرها فكرة الزفاف الفرعوني .. وعمري ما قصرت يوم فشغلي وربنا وحده يعلم وبعد كل ده قرر مدير عام القرية الفرعونية بفصلي عشان أشدت باحتفالية طريق الكباش، آه والله زي ما بقولكم كدا".

 

وتابعت: "أنتم عارفين أد إيه أنا بحب شغلى فى القرية الفرعونية، ولما بشوف أى حاجة سياحية بتتعمل فى مصر، بجرى عشان نعمل زيها عندنا فى القرية، وده اللي حصل بعد ما شوفت احتفالية طريق الكباش المبهرة بحضور الرئيس السيسى، وزيي زي أى حد كان منبهر، علقت على منشور كاتبه أحد أقارب ملاك القرية اللى عايشين فى أمريكا اللى كان بيشيد فيه بالاحتفالية ومبسوط بيها جدا، فكتبت ياريت نعمل زيها عندنا عشان نشجع السياحة المصرية رغم إن القرية منشأة خاصة، فالراجل كتب وقال ما معناه ياريت طبعا بس عشان هو عارف حاجات احنا منعرفهاش انتقد مدير القرية، فأنا طبعا ماليش دعوة باللي بيحصل، المهم شغلى وبس".

وأضافت: "بعدها بكام يوم فوجئت بمدير القرية بيقولى تعالى عايزك وبيقولي إزاي تعلقى وتكتبي كدا.. رغم إن كتبت إشادة عادية جدا كلنا كتبنا زيها على صفحتنا بعد الحفل، وبيبلغني إنه عايزني أمضى على استقالة، وبعدين فهمت إنه كان عايزني أرد على كلام الراجل اللى اتهمه بالفساد واشتمه وقالي المفروض كنتي هزأتيه وانا متربتش علي كدة.. وبدلا ما ياخد حقه بالقانون أو يرد هو عايزني أنا اللى أرد عليه. مكنتش مصدقة نفسي من الصدمة وقومت دخلت مكتبي اعيط ازاي عايزني اسيب مكان شغلي اللي بحبه وكنت بحلم دايما أكبره واستحملت فيه كتير من ظلم الادارة ونفسنة وحقد وكره اني أكون شاطرة او اعمل اَي فكرة تعجب اصحاب القرية ف امريكا واستحملت خصم 30٪؜ من مرتبي وكنت ف فترة الحمل أثناء كورونا وبعد عودتي للعمل لقيته بيبلغني انه أخد كل رصيد إجازاتي خلال 6 سنين فترة عملي وكمان عمولتي اللي كانت بمبلغ كل ده وساكتة عشان بحب شغلي  يجي هو يقولي أمشي مش عايزينك ولو مش عاجبك امشي قانوني". 

وأوردت "الشيخ": "طبعا تانى يوم قررت أروح شغلى عادي وأشوف حصل إيه، لقيت نازل قرار بمنعى من الدخول، ومنعني اخد حاجتي اللي ف مكتبي واخدو كل الداتا اللي تعبت في تجميعها سنين وساعتها قررت أخد حقى بالقانون، عملت محضر 7921 إدارى بتاريخ 1/12 ، بقسم الجيزة  ثم روحت مكتب القوى العاملة وقدمت شكوى ضد مدير القرية حملت رقم 162 بتاريخ 1/12، بتهمه فيه بالفصل التعسفى، وطبعا القضية خلاص راحت محكمة، ومش هسيب حقى وهاخده بالقانون". 

واختتمت راندا كلامها: "إزاي يقرر مدير يقطع عيش موظف ويسببله الأذي النفسي والمادي ده.. أنا حرفيا مش بنام وبدعي ربنا يجبلي حقي منه الإحساس بالظلم وحش اوي بس ربنا كبير واسمه الحكم العدل وهيجي اليوم اللي ربنا يرد فيه المظالم . فإذا دعتك قدرتك علي ظلم الناس تذكر قدرة الله عليك".