صاحبة صورة التدخين بمباراة مصر والكاميرون:" بحب التدخين وأنا حرة"
الجمعة 04/فبراير/2022 - 06:56 م
علقت أميرة العادلي عضو مجلس النواب عن تنسيقية شباب الأحزاب والسياسيين، على ما أثير حول التقاط صورة لها مثيرة للجدل أثناء تدخينها السجائر بمدرجات مشجعي منتخب مصر خلال مباراة الكاميرون.
وقالت عبر صفحتها الشخصية على موقع التواصل الاجتماعى ،" طيب عشان نخلص من القصة والرسايل الكتير.. ايوة دي صورتي ..ومش مضايقة ولا مهتمة بالموضوع ...انا بشرب سجاير ومن سنين بطت اعدها ومش مخبيه ده اصلا..ومش هاابطل السجاير واكون انسان جديد عشان انا بحب أدخن ..عادة صحية سيئة بس بحبها ..زي اللي بيحب الأكل الدسم كده بيتخن وغلط علي الصحة بس بيحبه."
وتابعت "ببساطة مواطن مصري زملكاوي بيشجع كورة من الطفوله وبيحضر ماتشات فريقه ومنتخب بلده ديما في الدرجة التالته مش المقصورة ولا الدرجة الأولي..بيفرح ويعيط ويتعصب ويزعق ويطنط ويهتف ويغني و بيأكل ويشرب ويدخن سجابر عادي جدا ..ومعلوماتي إن علب السجاير مكتوب عليها لا تباع لأقل من 18سنة".
وقالت "بغض النظر عن نوعه أو شغلنته أو ديانته..والتدخين ضار جدا بالصحة ومانصحش حد يدخن ..غير كده. انا بدخن و بحب أدخن ..وانا حرة في عالم حر .. فا نفكنا بقي من الكلام الاهبل ده ..ونشجع منتخبنا يوم الأحد وإن شاء الله الأبطال يرجعوا بالتامنه ويفرحوا مصر كلها".
