نشوي الحوفي باحتفالية يوم المرأة للرئيس: "حضرتك كنت ماشي على سلك رفيع والناس لازم تفهم"

ألقى الرئيس عبدالفتاح السيسي، اليوم الأربعاء، كلمة خلال احتفالية يوم المرأة المصرية، تحت شعار " المرأة المصرية مفتاح حياة"، وذكر الرئيس فضل المرأة المصرية في تخطي الأزمات التي مرت بها مصر قائلاً: " أنا ماكنتش ببالغ لما بقول إن المرأة المصرية هي سبب أصيل في حالة النجاح اللي بنعيشها، وعايز أفكركم بالأحداث اللي تمت على الأقل في الـ10 سنين اللي فاتوا، المرأة كانت محركة وصانعة للأحداث، لما جينا حتى في برنامج الإصلاح الاقتصادي قولنا محتاجين دعم المرأة المصرية، مرينا بنجاح بسبب دعمها، وفي ظروف قاسية جدًا جدًا مرت على الوطن والشعب المصري، وأنا بقولكم الكلام ده وبسجله في التاريخ افتكروا بإنصاف، أي زوج يفتكر بإنصاف زوجته بتعمل إيه، أي إبن يفتكر بإنصاف والدته بتعمل إيه".

وتابع الرئيس: " في ظروف قاسية مرت علينا في برنامج الإصلاح الاقتصادي، وأنا بقولكم إن لولا ربنا سبحانه وتعالى ولولا هذا الموقف ماكناش هننجح، صدقوني لو ماكانش البرنامج وفقنا فيه بفضلكم ودعمكم في ظل الأزمة العالمية إحنا موقفنا كان هيبقى صعب أوي أوي".

ومن جانبها قاطعت الكاتبة الصحفية نشوي الحوفي الرئيس لتقديم له الشكر والعرفان على ما يقوم به من أجل مصر، وذكرت أنه تحمل مسؤولية مصر في فترة عصيبة وأنه واجه العديد من التحديات ولولا محاربته لما كانت مصر وصلت لما هي عليه الآن، وقالت باكية: "ياريس إحنا لازم نشكر حضرتك، حضرتك أخدت قرار في وقت صعب، حضرتك اتحملت مسؤولية البلد في وقت صعب، حضرتك كنت ماشي على سلك رفيع والناس لازم تفهم، حضرتك كنت بتحارب سياسة وعسكرية واقتصاد، أنا عارفة ازاي اتخاذ القرار مش سهل، كتر خيرك أنا بقولهالك من قلبي".

وتابعت: " لازم ننسب ليك الفضل، شكرًا ليك إنك اتحملت كل حاجة، اتحملت الكلمة الصعبة، والمجتمع اللي مش راحم، والمجتمع الدولي اللي ماكانش راحم وضاغط، أنت اتحملت مسؤولية مصر في عز الأزمة، لما انسحب السياح من مصر، ولما اتفرض علينا قرارات، شكرًا لانك اتخذت القرار الصح في الوقت الصح".