ناقد فني ينتقد فيلم أحمد حلمي: أنت رجعت للخلف

انتقد الكاتب الصحفي والناقد الفني هاني عزب الفنان أحمد حلمي بسبب فيلم "واحد تاني" وذالك من خلال صفحته الرسمية علي موقع التواصل الاجتماعي "إنستجرام" معلقاً "عفوا ...أحمد حلمي أنت ترجع للخلف...والدليل فيلم واحد تاني " .

ونشر سبب انتقاده للفيلم قائلا " أنا اتفرجت على فيلم "واحد_تاني" للنجم الكبير احمد_حلمي والحقيقة مكنتش مبسوط بالفيلم.. ومبدئياً حلمى هو أهم نجوم الكوميديا فى مصر والوطن العربى ودى مفيش خلاف عليها... وكمان مينفعش أحلل فيلم بناء على منظور أخلاقى وإن الفن إبداع … إلخ.

وتابع " بس ثوانى كده الفيلم مبتذل وقايم على إيحاءات خارجة لا يصلح للأطفال مع العلم إن الفيلم +13.. بس حلمى كان أهم ما يميزه إنه بيعمل فيلم كوميدى أو فيلم فيه تمثيل وكله بيكون محترم من غير أى إيحاءات أو مشاهد خارجة.. الفيلم قصته بالكامل قايمة على كده حتى كل الإيفهات اللى بتضحك شوية كانت قايمة على الإيحاءات.. إيه اللى حصل لحلمى فى السينما؟ وليه وصل للمستوى ده؟ هل الكوميديا فى وقتنا الحالى بتبقى قايمة على الإيحاءات؟ ده مجرد سؤال ونفسى ألاقى ليه رد".

واستطرد ،" الدليل هل حد يقدر يشوف خيال ماتة مرتين ولا صنع فى مصر ولا على جثتى اللى كلهم فشلوا فى السينما وكمان فشلوا فى العرض التلفزيونى باعتراف حلمى نفسه.. حقيقى بحب حلمى جداً وبثق فيه وفى اختياراته بس لحد إمتى 11 سنة اختيارات غلط وأعمال دون قيمة.. طب الفيلم جاب إيرادات.. الإجابة اه.. بس ده لأن مفيش أوبشن غيره فى العيد.. وهما ٣ أفلام معروضة فطبيعى يجيب فلوس فى ظل سعر التذكرة الغالي.. وبالمناسبة شارع الهرم جاب قبل كده فلوس وكتير".

وتابع ،" عزيزى حلمى أرجو تتقبل رأيى بصدر رحب وإن رأيى من مُحب محتاج وقفة ومحتاج تراجع نفسك فى أعمالك الجاية.. وهل طبيعى إن الأغنية تبقى أنجح من فيلم؟ مش حلمى اللى يكون فى المستوى ده ولا ده المنتظر من نجم كبير زيك".

فيلم "واحد تاني" بطولة أحمد حلمى، وروبى، ونسرين أمين، وعمرو عبد الجليل، وسيد رجب، وأحمد مالك، ونور إيهاب، وعدد آخر من الفنانين، ومشاركة عدد من ضيوف الشرف منهم عمرو وهبة، ومن تأليف هيثم دبور، وإخراج محمد شاكر خضير، وإنتاج شركات “سينرجى فيلمز”، و"ماجيك بين"، وأفلام مصر العالمية، و"أوسكار".

وتدور أحداث فيلم "واحد تاني" حول موظف يعمل أخصائيا اجتماعيا في مصلحة السجون، حيث يجري مقابلات مع المساجين ويكتب تقارير عن حالتهم النفسية، وفي السجن يقابل أحد زملاء دراسته القدامي ويكتشف أنه أصبح رجل أعمال ناجحا، وعقب خروجه يدعوه لحفل يجمع زملاءهم القدامي ليكتشف الموظف أنه أفشل زملاء جيله ويعيد التفكير في حياته مجددا