"استدرجتها لسرقة قرطها الذهبي".. فرحة عارمة بين أسرة الحاجة خضرة بعد إحالة أوراق المتهمة لفضيلة المفتي.. ونجل المجني عليها: "الحمد لله ربنا جابلنا حقنا" (فيديو)

قضت محكمة الجنايات بالفيوم، الدائرة الثالثة، أمس السبت، برئاسة المستشار محمد إيهاب، رئيس المحكمة، بإحالة أوراق المتهمة الأولى "كريمة. م. أ"،  في قتل الحاجة خضرة محمود خضر البالغة من العمر 80 عامًا، والشهيرة بـ "أم طامية"، إلى فضيلة المفتي، قبل صدور الحكم بالإعدام، وتأجيل محاكمة المتهمين الآخرين إلى جلسة 3 يوليو المقبل.

وعبر سيد، نجل المجني عليها عن فرحته العارمة بعد إحالة أوراق المتهمين لفضيلة المفتي، وقال لكاميرا "مصر تايمز": " الحمدلله ربنا كرمنا، وبشكر القضاء العادل على الحكم، وبشكر رجال الشرطة وكل اللي ساعدنا وجابلنا حقنا، وأنا ماكنتش متوقع حكم النهاردة، لإن المحاميين قالولي إننا هنستنى 3 جلسات قبل النطق بالحكم، فالحمدلله ربنا كرمنا وسيادة المستشار نطق بالحكم النهادرة، وإحنا راضيين بقضاء ربنا علينا، وأول ما سمعت الحكم ارتاحت نفسيًا أنا واخواتي، النار اللي جوانا بردت الحمدلله، وجيراننا كلهم كانوا فرحانين علشان حق أمي رجع وزغرطولنا من حبهم في أمي".

وأضاف: "بنتي اتولدت في نفس اليوم اللي أمي ماتت فيه وسميتها خضرة على إسمها، ربنا عوض علينا أخد واحدة وبعتلنا واحدة تانية".

وقالت نجلة الحاجة خضرة وهي باكية: " الحمدلله ربنا جابلنا حقنا، بشكر القضاء العادل اللي فرح قلوبنا، أمي دي كانت صديقتي وروحي وكل حاجة ليا، لو كانوا خيروني بين نور عينيا وأمي كنت هقولهم خدوا نور عينيا بس أمي تفضل عايشة".