مأساة "على" في قنا.. أصدقاء السوء خلوه يصرف نصف مليون على مخدر "الشابو".. وأسرته:"ربطينه بالسلاسل عشان بيكسر الدنيا" (فيديو)

ينساق بعض الشباب إلى أوهام "السعادة المؤقتة" التي تمنحها لهم المخدرات، اعتقادًا منهم أنها سعادة دائمة، ولكن لا يدركون ذلك إلا بعد الوصول لمحطة الهلاك، ورصدت كاميرا "مصر تايمز" حالة شاب في مقتبل العمر يدعى "علي"، فقد قواه العقلية بسبب الإنصياع وراء أصدقاء السوء الذين  قاموا باستغلاله طمعًا في أمواله، وقاموا بإيهامه بسعادة مخدر "الشابو" المؤقتة، ونظرًا لقيام "علي" بضرب المارة في الطرقات والقيام بأفعال لم يحتملها أهالي قنا، فقرر أخيه الأكبر ربطه بـ"الجنازير" تجنبًا لحدوث مشاكل أو خسارة أخيه.

وقال شقيقة الأكبر خلال البث المباشر:"أنا مش فرحان بربطة أخويا، بس أنا ربطته تجنبًا للمشاكل، لإنه بيتعرض للضرب والإهانة في الشارع، وجايب الإهانة لنفسه وأخواته البنات ولأبوه وأمه المتوفيين، لإنه بيمشي في الشارع بيضرب أطفال وكبار في السن وكل الناس، ولو حضر فرح أو عزا بيبوظوا بسببه لإنه مش في كامل قواه العقلية، وبدأت الناس تيجي تشتكيلنا وتقولنا شوفولكوا حل وابعدوه عننا، فاضطرينا نربطه لإن ده كان أنسب حل".

وعن سبب وصول أخيه لهذا الحال قال: " علي اتعرف على مجموعة شباب كانوا أصدقاء سوء، عملوا نفسهم حبايبه وأصحابه علشان طمعانين في فلوسه، وعلموه الإدمان لدرجة إنه كان مدمن مخدر الشابو، وباع بيته وأرضه وصرف نص مليون جنيه على المخدرات، ووقت ما كان عايز يبيع البيت حاولنا نمنعه كتير لكن هو صمم وباع البيت"، وأستغاث الأخ الأكبر لـ "علي" بالمسؤولين خلال البث المباشر: " أنا كل اللي بطلبه من المسؤولين إنهم يساعدونا في حل مشكلة علي وعلاجه لإننا تعبنا معاه جدا".

وبالرغم من أن "علي" كان محاط بأصدقاء السوء، إلا أن العناية الإلهية وهبته صديقًا حاول مرارًا مساعدته ومستمر في مساعدته حتى ينتشله من ضياع الإدمان، وقال صديق "علي" لكاميرا "مصر تايمز": " أنا كل اللي بتمناه إني أشوف علي كويس زي زمان ونفسي يخف ويرجع لطبيعته، ونفسي صوتنا يوصل لوسائل الإعلام علشان يساعدوا علي وكل الشباب اللي زيه".