عروسة كفر الدوار كفر الدوار صاحبة شروط كتب الكتاب لـ"مصر تايمز":"أنصح كل البنات انهم يعملوا زيي" (فيديو)

تداول رواد موقع التواصل الاجتماعي "فيسبوك" في الساعات الأخيرة الماضية، مقطع فيديو لعروسة تشترط مجموعة من الشروط على عريسها قبل إمضاءها على عقد قرانهما، واختلفت آراء رواد مواقع التواصل الاجتماعي بين مؤيد ومعارض لشروط العروس، وقالت العروس لعريسها: " أنا واثقة في ربنا وفيك إنك هتكون خير الزوج والسند والصاحب، ماندمتش يوم إني اختارتك بل بالعكس كنت انت اعظم انتصاراتي واختياراتي في الحياة، هطلب منك طلب، انا زي ما هشيل أهلك في عيني، تشيل أهلي في عينك والصغير قبل الكبير، ومع احترامي لكل أهلي أمي ثم أمي ثم أمي، وأبويا كمان علشان مايزعلش".

وروت العروسة "أمنية طارق" ووالديها لكاميرا "مصر تايمز" خلال البث المباشر تفاصيل مقطع الفيديو الذي تم تداوله على موقع "فيسبوك"، وقالت والدة العروس: " ده كتب كتاب عادي، فجاة لقينا الدنيا اتقلبت علشان بنتي قالت كلمتين حلوين لخطيبها، هي بتوصي خطيبها إنه ياخد باله مننا واستشهدت بحديث الرسول، وعملتها بشكل دعابة عشان محدش يزعل من حد وكل الناس ضحكت والعريس كان مبسوط". 

وقال "طارق" والد العروس: " كان فيديو عادي جدا لكتب كتاب فجأة لقينا تاني يوم كمية إهانة وشتايم لينا، مش عارفين ليه كل ده، وكل واحد حر في كلامه اذا كان نقد بناء أو هدام، وأنا بتجاهل الانتقادات، وبقول لأمنية انتي هتفضلي روحي في جسدي".

وعن ما تم تداوله بشأن انفصال العروسان، قالت والدة العروس: " الكلام ده كله إشاعات والحمدلله هي لسة على ذمته ودبلتها في إيديها، انا مش عارفة الناس بتطلع كلام مالوش لازمة ليه".

أما العروس "أمنية" فقالت: " كان كتب كتابي عادي واتكلمنا وضحكنا، وفجأة لقيت صحابي نزلوا الفيديو وبقيت ترند، إزاي مش عارفة، الانتقادات دي مضايقاني لاني مش يوتيوبر ولا حد مشهور بس عادي ده طبيعي على أي حاجة بتنتشر على السوشيال ميديا، وخطيبي وأهله متقبلين كل الكلام اللي انا قولته بس النقد مضايقه خصوصا اننا بلد أرياف، وأنا كنت ناوية اني هقوله كلمة في كتب الكتاب بس ماكنتش محددة ايه اللي هقوله واللي قولته ده كان كلام تلقائي وليد اللحظة".