زوج عروسة كفر الدوار صاحبة شروط كتب الكتاب: الناس افتكرت بعد الفيديو ده إن الكلمة كلمتها .. أنا راجل و بعرف اسيطر (خاص)

تداول رواد موقع التواصل الاجتماعي "فيسبوك" في الساعات الأخيرة الماضية، مقطع فيديو لعروسة كفر الدوار بمحافظة البحيرة، وظهرت العروس في مقطع الفيديو في حفل عقد قرانها، وقبل أن تمضي على عقد القران طلبت من المأذون أن تخبر زوجها بشئ، وقامت باشتراط مجموعة من الشروط عليه، واختلفت آراء رواد مواقع التواصل الاجتماعي بين مؤيد ومعارض لشروط العروس، وقالت العروس لعريسها: " أنا واثقة في ربنا وفيك إنك هتكون خير الزوج والسند والصاحب، ماندمتش يوم إني اختارتك بل بالعكس كنت انت اعظم انتصاراتي واختياراتي في الحياة، هطلب منك طلب، انا زي ما هشيل أهلك في عيني، تشيل أهلي في عينك والصغير قبل الكبير، ومع احترامي لكل أهلي أمي ثم أمي ثم أمي، وأبويا كمان علشان مايزعلش".

وقال "أحمد" زوج "أمنية" صاحبة الفيديو المتداول على "فيسبوك" لـ "مصر تايمز" خلال البث المباشر: "هي بتوصيني على أهلها وعادي مفيهاش حاجة بس من باب الذوق انها لما تنزل حاجة على الفيسبوك تقولي، أنا عارف انها فرحانة وبتنزل على صفحتها بس ايه بقى اللي نشر الفيديو كدة بين كل الناس؟، زي ما في واحد بيحبك في مليون بيكرهك".

وعن الانتقادت التي وجهها رواد موقع "فيسبوك" له قال: " الناس اللي اخدت الفيديو وعملت عليه نكت والناس اللي اخدت صور من الفيديو وشتمت فيا بقولهم حسبي الله ونعم الوكيل فيكوا، والناس اللي كانت فرحانة من قلبها وتعليقاتها ايجابية بقولهم ربنا يخليكوا ويفرحكم دايما".

وأضاف: "مفيش اي حاجة وحشة بينا دي بنتي ومراتي واختي وصاحبتي بس الموضوع اخد اكبر من حجمه، الناس افتكرت بعد الفيديو ده ان الكلمة كلمتها انا عايز اقول اني راجل وبعرف اسيطر وبعرف اخد حقي، يعني انا بعرف احل مشاكل الناس مش هعرف احل مشكلتي؟، واحنا كويسين مع بعض مفيش حاجة وحشة بينا، ده ربنا بيغفر للعباد أنا مش هغفرلها؟ وبقول لأمنية أول وآخر مرة تنزلي حاجة على السوشيال ميديا، وربنا يخليكي ليا ويقدرني اني اسعدك".