آية ضحية الطلاق الغيابي: كان عايزني ألبس النقاب ومراته فى فرنسا رقاصة

قالت آية أحمد ، ضحية الطلاق الغيابي لزوجها الذى طلقها بناءا على طلب زوجته الفرنسية ، على حد قولها ، أن طليقها أخذ منها 30 ألف جنيه وطلقها بسبب زوجته الفرنسية التى تعمل راقصة ، مضيفه" قالي الطلاق على الورق بس بيني وعلي النية انتي مراتي".

وتابعت فى مداخلة هاتفية ببرنامج كلام الناس مع الإعلامية ياسمين عز ،" الناس هاجمتني إن بقول على مراته رقاصة بس هي شغلانتها كده أنا ماليش علاقة وكان عايزني هنا ألبس النقاب ويقولي بخاف عليكي وبغير عليكي وهو مراته رقاصة".

وكانت فتاة تدعي آية أحمد أثارت الجدل بعد منشور لها حول تخلي زوجها عنها بسبب زوجته الراقصة الفرنسية بالرغم من إنها كانت تفعل له كل ما يريده، وقالت آية بعد إنقاذها من الموت بعد محاولتها الانتحار،" الحمد لله أنا كويسة  وعلشان انهي بس الجدال اللي حاصل من امبارح ده ! لأني وحياة ربنا انا واحدة نزلت الكلام ده وهي بين الحياه والموت لا في دماغي تريند ولا شهرة ولا اي كلام من العبط ده! ".

وتابعت "اللي هيبعت لإسراء اختي كلمة تضايقها انا مش هسامحه! انا قولت جملة اتقالت منها وقت ستريس وانا علشان حزينة اثرت فيا وبزيادة! انما هي اختي اللي بحبها و ماقدرش استغنى عنها واستحالة احطها في موقف ان حد يقولها كلمة مش حلوة!..ولاد محمد طليقي دول ولاده من طليقته المصرية كان متجوزها من 22 سنة وطلقها من 15 سنة ! يعني ماخطفتوش من مراته وولاده تمام!..مرات محمد الفرنسية دي متجوزها وعلى حسب كلامه انه عايش معاها بس علشان الجنسية الفرنسية او ع الاقل ياخد كارت الإقامة بعشر سنين! يعني انا واحدة مسلمة اتجوزت زواج شرعي إسلامي عادي جدا لا يشوبه شيء! ".

وقالت "ماكنتش اعرف انه عايش تحت ضلها وفلوسها ولا حاجة ده كان في نظري حاجة كبيرة اوي شايل مسؤولية بيته وبيتي وبيوت ناس تانية كتير للخير! انما الموضوع مااتكشفش ع حقيقته غير لما مراته عرفت انه متجوزني وطردته من الشقة وأمرته إنه يطلقني وقالها سمعا وطاعة! هنا بقا وضحت الامور واحدة واحدة وبدأت اشوف كل اللي كنت معمية عنه! ..كل اللي قولته ان اهلي كانوا رافضينه وانا وقفت قصادهم وحاربت الدنيا علشانه وعشان بحبه!!! انما بعد ما الموضوع اتوفق اهلي كلهم كانوا فرحانينلي وابويا اهو وكيلي في الصورة وماخسرتوش ولا اي حاجة! فياريت نبطل اي كلام باطل مالوش اساس م الصحة! وانا عايشة مع اهلي من ساعة مااتجوزني وسافر ولحد دلوقتي لأنهم اهلي ولا انا بيعتهم ولا هما باعوني! انا خصيمة اي حد قال عليا كلمة وحشة قدام ربنا يوم القيامة!".

وقالت ،" اني اتنازلت عن حقوقي بقا دي اكبر غلطة انا غلطتها في حياتي! ده شخص قاللي انا نازل اجازتي بفلوس كذا! قولتله ولا يهمك ياحبيبي انا شارياك بمصحف وسبحة! لا شبكة ولا مهر ولا قايمة انت عندي بالدنيا ومدام ارتضيت دينك اي حاجة تانية مالهاش لازمة! *آه ارتضيت دينه لأنه ده كان الظاهر ليا وللكل* اللي حصل بعد كدا ماكانش غير انه صدمات ليا متتالية مش اكتر! وكان عقابها ليا اني ماليش حقوق بعد الطلاق وكل اللي طلبته منه المبلغ اللي استلفه مني ورفض يرجعه الا لما اتنازل عن اي حق ليا علشان يضمن اني ماارفعش عليه قضايا!".

وكانت آية أحمد، قد روت خلال الساعات القليلة الماضية، قبل محاولتها الانتحار، الذي اختارته بعدما تملك اليأس والخذلان منها، على إثر ما فعله زوجها معها، بعدما قام طلقها غيابيًا وتخلي عنها، لزواجة بأخرى فرنسية، عقب فترة قصيرة جدًا من زواجهما.

وأكدت آية أحمد، أن هذا الزواج هو الثاني لها، بعدما تزوجت من قبل وهي قاصر، وكانت تتعرض للعنف والتعذيب بشكل يومي، لتظل بحسب ما ذكرت "مُطلقة" لمدة 7 سنوات، قبل هذا الزواج الثاني الذي انتهى بالغدر: "رغم رفض أهلي له، إلا أني قولت لا هو ده اللي هحارب الدنيا علشانه، الشخص اللي بشهادته هو شخصيا كنت خير زوجة ليه، اديته حب مافيش إنسان في الدنيا كان ممكن يديهوله، عمري ما كسرت ليه كلمة، وماقصرتش في حقه كزوجة ثانية، صونته وحفظته في غيابه قبل وجوده".