ناقد فني يهاجم تامر حسني وفيلم "بحبك": يواصل تحرشه بالستات
انتقد الناقد الفني أندرو محسن ، فيلم تامر حسني الجديد "بحبك" ، مؤكدا أنه يواصل تحرسه بالستات ويسخر منهم ويقدمهم بطريقة سطحية.
وقال أندرو عبر صفحته الشخصية علي موقع التواصل الاجتماعي حول فيلم " بحبك"،" تامر حسني في فيلم بحبك بيستمر في هوايته في السخرية من الستات وتقديم الشخصيات النسائية في شكل سطحي يصل إلى حد التفاهة، والصراحة مابقتش أستغرب من اختياراته دي، لأنها مرضية لشريحة كبيرة من المجتمع، لكن باستغرب من إن فيه ممثلات بيقبلوا يعملوا شخصيات بالشكل ده ومن غير أي مبرر درامي".
وتابع عن فيلم بحبك للنجم تامر حسني ،" في الفيلم علي (تامر) بيقابل حبيبة (هنا الزاهد) وفي أول لقاء بيسخر منها بكل الطرق الممكنة وغير الممكنة، ومع ذلك -طبعًا- بتقع في حبه وبتضحك هي وأصحابها كمان من اللي بيقوله عليها!في مشهد بعد كده علي واقف مع حبيبة وبيبدأ وصلة جديدة من التنمر فهي بتقوله إنها هتديله بالجزمة فبيقولها يلا أنا موافق (حاجه تضحك أوي) فبتوطي فعلا عشان تقلع الجزمة، وبتكون لابسة جزمة ليها كذا أبزيم ويا حرام عشان هي بنت مش عارفه تفك الأبزيم بتاع جزمتها وبتقوله أصلي رابطاه أوي فعلي عشان راجل جدًا بيوطي يساعدها عشان تقلع الجزمة وفجأة يقوم بايسها! عادي كده، والمفروض إن ده مش تحرش لا ده حب".
وقال "أقصى رد فعل من حبيبة إنها لما بتشوفه تاني جوه المطعم بتقلب عليه صينية أكل فبيروح بايسها تاني وقايلها بعتاب "إيه الشرب ده كله؟" وده عشان هو راجل برضه، فعادي يتحرش بيها لكن من الرجولة إنه لما يشوفها بتشرب يقولها إن كده غلط.طبعًا مش محتاج أقول إن حبيبة بعد وصلات التحرش والتنمر والسخرية حبته، ده مش راجل عادي يا جماعة ده "دكر".
