قصة مؤثرة لـ دلال عبد العزيز أثناء كواليس مسلسل "سابع جار"
يحل اليوم 7 أغسطس ذكرى رحيل الفنانة دلال عبد العزيز، إلا أنها موجودة في قلوب محبيها ومتابعيها، وفي ذلك اليوم نسترجع موقفا مؤثرا للفنانة الراحلة دلال عبد العزيز روته المخرجة هبة يسري رمزي خلال تصوير مسلسل "سابع جار".
وكتبت هبة يسري رمزي عبر حسابها بموقع التواصل الاجتماعي "فيس بوك"، قائلة: "دلال عبد العزيز تستحق أن نحكي عنها مالم تحكيه ابدا و لو كنت رأيت منه القليل بالصدفة، في إحدى المرات كنا بتصور في مصر الجديده لقيت حد بيكلمها كل شويه بيسأل عن المكان وجاي لقيتها بتقولي دي بنت بتتفرج عليه وعايزه تشوفني عشان مامتها اتوفت قريب و وحشاها، اتأثرت شويه بس كنا شغالين و مدام دلال طلبت شويه وقت لغايه ما البنت تيجي".
وتابعت عن دلال عبد العزيز: وصلت بنت بسيطه محجبه شايله بيبي ميكملش ٣شهور و جايلها من مكان بعيد جدا عشان بس تشوفها اول ما البنت شافت مدام دلال عيطت جدا و فضلت تحاول تمسك نفسها بس مقدرتش و انهارت في العياط ساعتها دلال خدتها في حضنها و فضلت تطبطب عليها والبنت تعتذر مكسوفه عشان ماتبقاش بتبشر بحاجه وحشه ودلال تقولها عيطي ولا يهمك و تدعيلها و قالتلها ما انا كمان ماما ..مش انا برده ماما البنت قالتلها انا عايزه اوريكي بنتي عشان ماما ملحقتش تشوفها خدتها و لاعبتها و اتصورا مع بعض و البنت قالتلها أن ده احلي يوم في حياتها و شكرتها و مشيت و دلال كملت تصوير عادي بنفس روحها و كأنها بتعمل ده علي طول.
وأضافت: "البنت طلبت مني اصورهم وانا فضلت اتفرج واشوف اد ايه البنت البسيطه اللي جايه من مشوار طويل نزلت فرحانه و مبسوطه بحاجه بسيطه جدا دلال عبد العزيز عملتها منغير ما تفكر و لا تتردد ده موقف كان ليا حظ اني أحضره و عمرى ما شوفتها حكته لحد أو في برنامج او اتكلمت في الموقف لما خلص....يمكن مكانتش عايزه تحكي علي وهبه ربنا لها في حب الناس و قدرتها علي أسعادهم لكن هي دلوقتي تستحق الناس تعرف بجد هي اد ايه انسان نادر و بالذات أنها احتفظت بأنسانيتها و بأمومتها في حرب الفن و الظهور و النرجسيه اللي بتصيب الفنان مهما كان قوي و ثابت لكن الأضواء ليها مفعول سحري بيغير الناس إلا دلال عبد العزيز".
