محمود عزب: متتوقعش الأحداث وخليها على ربنا
قال الفنان محمود عزب ربنا له دايما تقسيمته، والحمد لله إني كنت محظوظ، متزوج وعندي أولاد، ومشوار ي الفني أنا راضي عنه، ده غير محبة الناس والجمهور، و بشتغل من وأنا صغير وسني 17 سنة، وأول مرة طلعت كان في سرادق الثقافة الجماهيرية، قالولي اطلع، من يومها والحمد لله ما نزلتش.
جاء ذلك خلال مداخلة هاتفية لبرنامج "فاكرني ياحظ" تقديم إنجي أنور على نغم إف إم، و أضاف الموظف اللي قدمني كان أ. إبراهيم عبد المجيد، في حضور الراحلة چيهان السادات، في واحد من سرادق الثقافة الجماهيرية بالوفاء والأمل، والأتوبيس اتأخر، والجمهور كان متواجد، فطلعت قلدت الممثلين؛ محمد صبحي، توفيق الدقن، وعباس فارس، وكانت حاجة حلوة قوي... كان ساعتها وزير الثقافة عبد المنعم الصاوي.
وتابع مش شرط اللي بقلده أكون بحبه، ممكن أكون واخد من الشخص موقف، لكن المهم عندي إني ما أجرحهوش، وبحب أكون رقيب على نفسي.
وعن الفنانة لبلبة فقال لبلبة وسيد الملاح قدموا ١٠ شخصيات مثلا في التقليد، لكن أنا كنت بقدم إحتياج المرحلة، فأشوف الشخصية وأبدأ أقلدها، ولازم يكون في رسالة من ورا التقليد، و بعتبر اكتشاف المواهب ومساعدتها في الأسمرات هي رسالتي الحقيقية، وفي التتر بحكي الحكاية.
روحت مع صديقي زيارة للأسمرات، وشوفت النقلة فيها والمباني، وابتديت أكلم نفسي، إن الأطفال اللي اتولدوا في أحياء عشوائية عزبة خيرة الله والدويقة وغيرهم لازم نقف جنبهم.
ابتديت أتعرف على الناس هناك، وفضلت أروح هناك لمدة سنتين، وشوفت أولاد موهوبين جدا في الغناء وفي الكورة والتمثيل، وفخور إني أقول إن مصر ولادة، وكان فكري إني أجيب لهم مدربين، وقد إيه حسيت بالدور العظيم اللي قدمه سيادة الرئيس عبد الفتاح السيسي في الأسمرات.
واختتم قائلا من النماذج اللي شوفتها في الأسمرات بنت بسيطة والدها طلعها من المدرسة، وفي الأسمرات دخلت فصول محو الأمية، ومنها أخدت الإبتدائية، وبعدها الإعدادية، وحاليا هي بقت ثانية ثانوي، ولما تسألها نفسك في إيه؟! قالت أكون دكتورة، في الأسمرات مش بس بتنقل الإنسان لمكان مختلف ولكن بشوف إن الأسمرات بناء للإنسان.
ونصيحة لا تتوقع الأحداث،خليها علي ربنا، بالكلمات دي ألخص مشواري، مشواري ضحك ولعب وحب.
اللينك :
