"فوقوا يا بنات"دعاء فاروق بعد حبس التيك توكر إبراهيم مالك
هاجمت الإعلامية دعاء فاروق التيك توكر إبراهيم مالك الذي لقي قبضه اليوم الأربعاء، وحبسه 4 أيام على ذمة التحقيقات في الاتهامات الموجهة إليه بنشر الفسق والفجور وخدش الحياء العام، على موقع التيك توك.
"فوقوا يا بنات"دعاء فاروق بعد حبس التيك توكر إبراهيم مالك
قائلة:"يا للهول من هذا التيك توكر اللي قبضوا عليه ... انا فتحت ابص اشوف مين ده بعدما امتلأت المواقع بخبر القبض عليه... مين هو اساسا ؟!! عملت سيرش علي إسمه لأني لا أعرفه أصلا ... فظهرت لي بعض تيكتوكاته شديدة اللزاجة وظهرت بعض الفيديوهات التي جمعت كل الطراش الذي يطرشه يوميا عبر قناته".
تابعت:" البنت منهم وهن اكثر من بنت تظهر بوشها عادي وبتتكلم معاه بحضرتك ترضاه لاختك وقال بتناقشه في مدى أحقيته في طلبه هذا ونجده يرد بلزاجته منقطعة النظير اه من حقي انا ملك من حقي يبقي علي يميني وعلي شمالي جواري طيب يا بنات هو يتحفلط ويطرش في فيدوهاته براحته وزمانه بيتحفلط في الحجز حالا !!! انتو ايه اللي طلعكم معاه اصلا اتبسطتي بقي ان فيديوهاتك طالعة مع واحد اتحجز بتهمة نشر الفسق والفجور ".
وأضافت دعاء فاروق:" لقد هالني وارعبني واتعبني إن بنت تطلع لايف مع أي حد كده وتصور نفسها وهي بتتكلم معاه فيطلب منها بسفالة وتطجين وقلة رباية وهطل رهيب انها ترقص له فتكمل حديثها معاه وقال ايه بتقوله ميصحش كده وترضاها لاختك ! ايه يا بنات انتو اتهبلتوا للدرجة دى ما هذه المرحلة من اللامبالاه اللي وصلتولها؟!! مش فارق معاكي سمعتك وشكلك وأهلك وقرايبك وجيرانك ودراستك وحياتك .. ايه يا بنات ده ؟؟!! ".
واستمرت دعاء فاروق كلامها"انتي بتعملي حوار قدام البشرية مع واحد بيقولك قومي ارقصي لي ومكملة الحوار عادى وبتتصوري عادى .. مترخصوش نفسكم يا بنات للدرجة دى !!! متلطوش نفسكم لطه هتندمي عليها العمر كله .. متجريش علي الفلوس السهلة بتاعت لايفات التيك توك مع أي حد ومن غير ما يكون فيه محتوي محترم فتلاقي نفسك بتجَرٍي أهلك وراكي في المحاكم ".
واختتمت دعاء فاروق كلامها:" فوقي منك ليها المكسب المادى ممكن تبقي فاتورته عالية جدا مش هتقدري عليها وهتخسري كل حاجة فلوس وسمعة ومستقبل.. الله يحرق النت علي النتيت ".
كانت قوات الشرطة بمحافظة الاسكندرية، اليوم الاربعاء، القت القبض على التيك توكر الشهير إبراهيم مالك، بتهمة تقديم محتوي غير لائق ونشر الفسق والفجور والتعدي على الفلاحين.
يذكر أن أحد الأشخاص، كان قد تقدم ببلاغ الي النائب العام، حمل رقم 1991575 لسنة 2022 يطالب بحماية المجتمع المصري وافراده من مثل هذه المحتويات.
وإدعي أن إبراهيم مالك يطلب من الفتيات الرقص له على موقع التيك توك وسبق له وتطاول علي فلاحين مصر في أحد الفيديوهات.
واتهمه البلاغ المقدم ضده بتقديم محتويات غير هادفة والتحدث ألفاظ خارجة وتطاول على الفلاحين في مصر.
وبعد الفحص وعمل التحريات تبين صحة إدعاء البلاغ المقدم، وبناء عليه قررت جهات التحقيق إصدار قرارها المتقدم.
