الرئيس السيسي: "لو ماعرفش أنا بعمل إيه ماقدرش أقف الوقفة دي"
قال الرئيس عبدالفتاح السيسي، إن كل قطاع في الدولة، بذل فيه جهودًا كبيرًا، منذ بداية توليه المسؤولية وحتى الآن.
الرئيس السيسي: "لو ماعرفش أنا بعمل إيه ماقدرش أقف الوقفة دي"
وأضاف الرئيس السيسي خلال كلمة، ضمن فعاليات الجلسة الختامية للمؤتمر الاقتصادي مصر 2022، اليوم الثلاثاء: "لو أنا مش عارف شغلي ماعرفش أقف الوقفة دي، لو ماعرفش أنا بعمل إيه، ماقدرش أقف الوقفة دي، في أي قطاع خد جهد من أول ما بدأ ولغاية دلوقتي ولغاية ما أمشي من هنا، جهد مش تنظير.. بل فكرة وحل المسألة".
وتابع الرئيس السيسي، "المرتبات تعبانة، أيوة تعبانة، والله العظيم باكلمكم من قلبي، أقل من 10 آلاف جنيه لأي حد، مايعيش، هتقولي طب انت بتعمل ميناء بـ40 مليار جنيه.. لازم أكون متوازن، غيري أكل وشرب وسابها على الحديدة، المسار الحالي أكبر من أي حد، لازم أشتغل على كل قطاعات الدولة، حد يقول لي مهتم بالحديد والأسمنت، طب والبشر؟ مهتم بكله".
واصل الرئيس عبد الفتاح السيسي تصريحاته قائلاً: "حد يقول لك دول بيعملوا الجامعات الأهلية عشان يدوها للأغنياء، أنا باعمل مسار بتكلفة أقل عشان أحسِّن التعليم، باتخلَّص من القبح في كل شيء".
وقال الرئيس عبد الفتاح السيسي، إنَّ الدولة المصرية منذ 5 سنوات أو أكثر تحرص بشكل كبير على إعداد منصة للحوار، "كنا بنقول مؤتمر الشباب هيتم تناول فيه قضايا الدولة كلها مش قضية الشباب فقط، حتى القضايا الاقتصادية والاجتماعية والفكرية والثقافية، ونجحنا نعمل ده بشكل أو بآخر في المحافظات كمان، وسنويا حتى على مستوى العالم، جت كورونا يمكن في الظرف الأخير ده، مقدرناش نكمل بنفس المستوى اللي احنا بنتمناه".
وأضاف الرئيس السيسي، خلال كلمته في المؤتمر الاقتصادي: "أنا عاوز أأكد تاني، المؤتمر الاقتصادي لازم ينتج عنه منصة اقتصادية مستمرة وتلتقي كل سنة ونقول ده كشف الحساب، اللي هو ييجي كحكومة وقيادة دوريًا كل 3 شهور، تقرير بالإنجاز اللي احنا قدرنا نحققه، خلينا بس وأنا بتكلم للدكتور ضياء رشوان، نكمل كلامنا بقى، في النقطة التي تسري هذا اللقاء وتكمل على ما بدأناه، احنا لما اتكلمنا على أننا نعمل حوار وطني، الحوار الوطني كان عام، مش اتجاه محدد، نطرح كل القضايا وكل الجهات اللي عاوزة تتكلم تتكلم مش سياسي بس، اقتصادي، واجتماعي، وإعلامي وثقافي وديني كمان".
