سيدة تستغيث من سائقي أوبر: الكابتن كان شارب مخدرات
استغاثت سيدة من سائقي شركة أوبر يعد تعرضها لموقف عرض حياتها للخطر ، من سائقي الشركة وكان منهم واحد تحت تأثير المخدرات.
سيدة تستغيث من سائقي أوبر: الكابتن كان شارب مخدرات
وقالت السيدة فى استغاثتها ضد سائقي أوبر "صباح الخير.. امبارح بليل اتعرضت لموقف يخوف جدا ..اتأخرت في الشغل و ركبت اوبر بليل علشان اروح من مصر الجديدة للتجمع.. ركبت العربية و كان الراجل بيحط قطرة و بيشرب سيجارة في نفس الوقت و قافل الشبابيك فطلبت منه يفتح الشبابيك علشان دخان السجاير قالي بس مش هارمي السيجارة لانها بقت بخمسة جنيه.. قولت يا بنت اسكتي و اخلصي، كان عمال كل شوية يتلفت و يبص لي ويضحك ، كنت انا عاملة شير للرحلة مع بنتي علشان تشوفني فين قمت مكلماها و فضلنا نتكلم القصة كلها اخدت اقل 10 دقايق لقيت عربية بتزنق علينا و فتحوا الشبابيك و قعدوا يشاورا لبعض و يضحكوا جدا و قام سواق الاوبر شاور له ان على طول فقولت للسواق ايه ده ضحك جدا بصوت عالي وقعد يتلفت يكلمني و هو سايق ان الشعب المصري بيحب يتعرف على بعضه و انه ما يعرفش الراجل الثاني ده لكن اهه بيونسنا".
وتابعت عن واقعتها مع سائقي أوبر ، " وابتدى الجو يبقى اغرب و بقى بيجري بسرعة لقيت عربية واقفة على طريق السويس عطلانه وراجل واقف بيصلحها قولت له ده جوزي واوقف حالا علشان انزل له تنح شوية قمت شخطت فيه و فتحت باب العربية قام واقف و نزلت على طريق السويس و طبعا العربية التانية اتفاجئت فوقف برضه لكن ابعد مننا بحته فا نزلت في الولا شيء وطلبت اوبر تاني بعد 10 دقايق عرفنا نوصل لبعض لان مفيش اي علامة نتقابل فيها..جالي وكان عايزني اعدي طريق السويس علشان اروح اركب و طبعا ما عملتش كده فاضطريت امشي من النقطة دي اللي هي تقريبا قبل تقاطع طريق السويس والدائري لاول مكان في الماظة فيه حياة و هي حاجة اسمها جاردينا و طلبت اوبر تاني".
وتابعت ، "عملت شكوى في اوبر بس لسه ما ردوش عليا لاني متأكده من ان سواق الاوبر الاولاني ده كان تحت تأثير مخدرات و الله اعلم و ان كان في قصة حزينة ماتحصل وربنا نجاني منها.. ارجوكم خصوصا البنات و الستات خلوا بالكم خصوصا لو بليل وطالعين طرق مقطوعة كده مش عارفة ايه اللي ممكن يتعمل زيادة تأكيد لكن خليكم منتبهين لتصرفات السواق واعملوا شير للرحلة دائما مع اهلكم وربنا ينجينا جميعا".
