حرم الرئيس السيسى: والدة الرئيس هى من شجعتني وعلمتني أن سبب نجاح أي بيت هو المحافظة على الخصوصية.. نواظب على رياضة المشي يوميا بعد صلاة الفجر..وحبه لعمله حرمنا من "شهر العسل"

حرم الرئيس: "محمد صلاح فخر لكل المصريين.. أم كلثوم معانا في كل ذكرياتنا الجميلة"

حرم الرئيس: حب الجار الجار وإحترام الأخر قيم مصرية تربينا عليها فى أحيائنا المصرية الأصيلة

السيدة انتصار السيسى: نعتز بنشأتنا فى أحياء مصر الشعبية ذات الأصالة

 

قالت السيدة انتصار السيسي، حرم الرئيس عبدالفتاح السيسي، إن شخصية الرئيس السيسى لم تتغير إطلاقا، مضيفة: "من أول الجواز، ومكنتش بعرف أعمل أكل وهو اللى علمنى.. ووقف معايا وساعدنى بمنتهى طول البال والحنية.. هو إنسان حنين على أسرته كلها".، موضحه أنهم يواظبون على رياضى المشي يوميا لمدة نصف ساعة بعد صلاة الفجر.

وأضافت حرم الرئيس السيسى: "الرئيس كان حنين على الأسرة الكبيرة والدته وأخواته وهذه أكثر صفة تصفه الناس بها..  حنيته على أهله".

وروت السيدة انتصار السيسي، حرم الرئيس عبدالفتاح السيسي، تفاصيل أول لقاء بينهما، قائلة: "هو جه عند جدتى اللى هى خالته، أول ما كلمنى ماحستش إنه واحد جاى يحب.. ده بيقولى أنت بتذاكرى كويس، وقالى ورينى كده - كنت عاملة جدول امتحانات – قالى ذاكرى كويس، لأن المذاكرة دى هى اللى هتوقف جنبنا، قلتله: جنب مين؟ أنا أصلا لسه يدوب بتعرف".

 

وأضافت حرم الرئيس السيسي، خلال حوارها مع الإعلامية إسعاد يونس، عبر فضائية "DMC": "كانت البداية فيها جدية، تحسسك إن الإنسان ده مسئول، واتكلمنا وعرفت منه إيه السبب اللى خلاه يبقى عاوز المواصفات دى، لأنه هيبقى ضابط، وهيبقى مسئول، ومش هيكون متواجد بالبيت فعاوز اللى يختارها تكون قد المسئولية اللى هتمشى معاه مشوار حياته".

وقالت السيدة انتصار السيسي، حرم الرئيس عبدالفتاح السيسي، إن زوجة أى ضابط سواء فى القوات المسلحة أو الشرطة، تتحمل المسئوليات بشكل كبير، مبينة: "بتتحمل المسئولية من الألف إلى الياء، مسئولية الأولاد والبيت وكل حاجة، وبتكون أب وأم فى نفس الوقت، لأن هو غصب عنه مش بيكون متواجد".

 

 

وأضافت حرم الرئيس السيسي، عدم تواجد الزوج الضابط مع أسرته لا يعنى أنه منفصل عن العائلة تماما، موضحة: "بالعكس كنا على طول بنتكلم وكان فيه تواصل دائم، رغم إن ساعتها التليفونات ماكنتش متاحة زى دلوقتى، وكنا بنتواصل فى أى حكاية بتخص الأولاد كأنه موجود معانا".

 

وكشفت السيدة انتصار السيسى، حرم الرئيس عبدالفتاح السيسي، عن وصية والدة الرئيس لها، قائلة: "لم تنصحنى لوحدى بل نصحت كافة فتيات وصبيان العائلة كوننا نعيش في بيت واحد.. وكنا في  بيت والده بمدينة نصر وكل البنات والصبيان جميعاً في بيت واحد.. وأنا دائماً أحب أقول إن والدته كانت أم مش علشان هى تعتبر خالتى لا لأنها كانت معانا كلنا كدة".

 

وأضافت حرم الرئيس السيسي، أن والدة الرئيس السيسى جمعت أبناء العائلة وأوصتهم قائلة: "اللى ينجح البيت إن كل وحدة فيكم يكون ليها خصوصية، وتبقى عارفة إيه الكلام اللى يقال والذى لا يقال.. وكل واحدة فيكم لها حرية شخصية تعتبر أنها فى بيت لوحدها.. وكلكم أبنائى وحبايبى البنات زى الصبيان".، مؤكده أن والدة الرئيس هى من شجعتها ودعمتها فى البداية وعلمتها أن سبب نجاح أي بيت هو المحافظة على الخصوصية.

 

 وقالت السيدة انتصار السيسى، حرم الرئيس عبد الفتاح السيسى: "أنا عندى أخ كبير وبعديه أختى وبعدين أنا وبعدين مصطفى أخويا الله يرحمه أصغر واحد فينا".

 

وأضافت حرم الرئيس السيسى: "والدى دائما كان يقولى احتفظى بهدوءك وطبيعتك الجميلة متغيريهاش، لأنى واخدة الطبيعة دى من بابا، هو إنسان هادى جدا جدا، وكلامه قليل وبيميل للهدوء والراحة، وهو كان بيحب الصيد ويحب يروح مع أصحابه رحلات صيد كتير، ودى اللى خلته طبيعته تبقى هادية".

 

 

وعن والد الرئيس عبد الفتاح السيسى، قالت: "باباه طول عمره إنسان جاد، والمحلات بتاعة خان الخليلى بالرغم إنها كانت كتير إلا أنه بيديرها إدارة رائعة وأولاده كلهم خدوا منه حسن الإدارة، وكان عنده كمية عمالة كتير جدا، وهم خدوا منه الالتزام".

 

وأكدت السيدة انتصار السيسي، حرم الرئيس عبدالفتاح السيسي، إنها لم يجمعها بالرئيس عبد الفتاح السيسى "شهر عسل" بسبب حب الرئيس لعمله، قائلة " "بعد ما اتجوزنا كنت أنا خلصت الكلية وهو ماكنش عنده وقت لشهر العسل خالص، وإحنا اتجوزنا يوم الخميس وكان يوم الأحد في الشغل"

 

أضافت حرم الرئيس السيسي": وهو بيحب شغله جدا وليه ديما أسبقية فى تفكيره للمرحلة اللى هو داخل عليها"، مشيرة إلى أن الرئيس: "بيحب كمان المتابعة، ولما بيكون موجود فى مكان يحب جدا يكون عارف كل تفاصيله .

 

وعن أول مرة تدخل فيها المطبخ بعد الزواج، قالت السيدة انتصار السيسى : "كنت ديما بحب اللى يجيلنا نعزمه على الغدا أو العشا، فكانت دى فرصة أنى أدرب بقى، وأنا بحب الطواجن اللى فى الفرن، والرئيس بيحب كل أنواع الخضار ويمكن الأولاد طالعين نفس الحكاية، وهما تقليديين جدا، والسلطة لازم تكون معمولة كويس جدا وكل أنواع الخضراوات تكون فيها، والحلو كنافة أو بسبوبة والأولاد طالعين بيحبوا الحلويات الشرقية".

 

وقالت السيدة انتصار السيسي، حرم الرئيس عبدالفتاح السيسي، إن أسرة الرئيس كانت تقيم فى حى الجمالية: "كنا فى شارع الجيش.. كان من الأحياء الشعبية حيث الأصول والمحبة والجيرة.. والجيران كان لها وضع خاص بالنسبة لكل الدنيا، ولو فيه مناسبة سعيدة كلهم بيتكاتفوا ويقفوا مع بعضهم وكذلك فى المناسبات غير السعيدة".، مضيفه قائلة " نعتز بنشأتنا فى أحياء مصر الشعبية ذات الأصالة ..وحب الجار وإحترام الأخر قيم مصرية تربينا عليها فى أحيائنا المصرية الأصيلة".

 

 

وأضافت حرم الرئيس السيسي، أن "هذه الأمور ضمن الأشياء التى أثرت على الرئيس في الحكم على المرأة المصرية بطريقة مختلفة، حيث رأى أن الست المصرية بتتعب وتشقى، وأمنية حياتها تشوف ولادها سعداء.. وأنها لا تفكر فى نفسها بل فى إن الأسرة تكون سعيدة".

وقالت السيدة انتصار السيسي، زوجة الرئيس عبد الفتاح السيسي، إن محمد صلاح فخر لكل المصريين، واتمنى إن الناس متخدش الموضوع من آخره، ويشوفوا الكواليس اللي ورا إنه يكون نجم، وهو فخر.

 

وتابعت حرم الرئيس في لقائها مع الإعلامية إسعاد يونس: "الرسالة اللي عاوزاها توصل لكل واحد، إنك لازم تتعب عشان توصل، مفيش حاجة بتيجي بسهولة".

كما كشفت السيدة انتصار السيسي، عن نجومها المفضلين، قائلة: " أم كلثوم، وكل أغانيها عظيمة، وأسمع كذلك للفنان عبد الحليم حافظ، والفنانة وردة الجزائرية".

 

وأضافت: "أم كلثوم معانا في كل ذكرياتنا الجميلة"، متابعة عن مشايخها المفضلين: "مصطفى إسماعيل والحصري، المنشاوي والطبلاوي".