سيدة تتهم مدير فرع بنك القاهرة بحلوان بالبلطجة بعد تطاوله عليها

تعرضت سيدة ووالدتها وبناتها التؤام للمعاملة السيئة من مدير فرع بنك القاهرة بحلوان والعاملين به بسبب رغبتها فى غلق حسابها، على حد قولها.

سيدة تتهم مدير فرع بنك القاهرة بحلوان بالبلطجة بعد  تطاوله عليها 

وقالت السيدة مستعرضة شكوتها ، "بنك القاهرة فرع حلوان اثناء وجودى هناك علشان اقفل حساب ودة طبعا لتدنى مستوى الخدمة هناك بداية من خدمة عملاء وصولا لسوء فى ماكينات الصرف الالى اللى على طول مش شغالة دخلت البنك وكان معايا والدتى لنفس السبب وكان معايا طفلتين توأم 7 سنين المهم انتظارنا دورنا وتوجهنا للموظف بتاع خدمة العملاء اللى قابل طلبنا اننا نقفل الحساب بسوء ترحيب وعذرته فى كدة مش مشكلة ماهو اكيد معاملة اللى هيفتح حساب غير اللى بيقفل حساب

وتابعت عن شكوتها ضد بنك القاهرة ،" المهم قالنا بعتنا الطلب وفى انتظار الرد 
الكلام دة كان حوالى الساعة12 ظهرا انتظارنا لحد الساعة 3 وطبعا علشان الظروف اضطرتنى اخد طفلتين معايا فزهقوا من الاعدة وقاموا وقفوا شوية فوجئت بموظف امن بيشاورلهم بإيده وهما واقفين جنبى قولتله هما هيعدوا جنبى ولو فى حاجة ياريت تقولى انا وانا هقعدهم ودة طبعا والفرع اصلا مستوى النظام فيه مش بالمهنية الكافية بمعنى ان ناس كتير واقفة وفى حالة هرج ومرج ومع ذلك قولتله حضرتك كلمنى انا وانا هقعدهم لانهم خافوا منه !! ازااااااااى بقة اقوله كدة وابدى يرد علية بطريقة سيئة وانتهى الحوار بإنى فوجئت بيه بيقولى انتى دماغك تعبانة !!!! طبعا راعيت انه راجل كبير وقولتله عيب ميصحش وهو برضوا بيرد

وقالت فى شكوتها ضد بنك القاهرة،" فوجئت بمدير الفرع المحترم اللى حد دخله وخرج انا طبعا من واقع تجاربى مع بنوك كتير وان المفروض فى طريقة محترمة فى خدمة العملاء وان هيكون فى احتواء للموقف كرد فعل طبيعى جدا فى مكان بيخدم عملاء ؛ فوجئت بمدير الفرع خارج بيزعق وشادد حيله اوى علية لدرجة انه زعق معايا واتكلم بأسلوب غير لائق نهااااااائى مع عميل فى البنك وبعد مالموضوع الى حد ماهدى مع انه خارج يزعق ومش عاوز يفهم اه اللى حصل الى جانب انى خوفت من طريقة التهديد والبلطجة بتاعتهم وكنت عاوزة اخلص واقفل الحساب طلعت موبايلى اعمل تليفون وخلصت واعدة منتظرة الموافقة بتاعة قفل الحساب اللى دخلت فى حوالى ٣ ساعات وهما طبعا متكدرين فوجئت بيه خارج تانى ومعاه اتنين وبيقولولى طلعى الموبايل انتى كنتى بتصورى قولتله موبايل اه وبصور مين واصروا انى اطلعوا وانا كنت رافضة وقولتله مش من حقك

وتابعت" لكن كان فى منهم اسلوب تهديد وبلطجة المهم طلعت التليفون وهو فى ايدى وبصوا على الصور وطبعا انا لاصورت ولا اى حاجة لكن من الواضح ان اللى على راسه بطحة……. طبعا كل دة بأسلوب سوقى وحقير  ولا يمت بصله للمهنية ولا التعامل مع عملاء البنك وطبعا انا اتفاجئت من طريقتهم اللى كلها بلطجة لدرجة انى لما خرجت من البنك فوجئت بموظف بيقولى انا موظف فى البنك وبقولك الناس دول ولاد ……. وشتمهم فعلى مايبدوا ان كل اناء ينضح بما فيه !!!بمنتهى الامانة مش عارفة فين الناس المسئولة عن ادارات معايير الجودة لما انا كعميلة بتعمل معايا كدة ويقولى انتى متعرفيش انا ممكن اعمل فيكى اه واطلبلك الشرطة تيجى تاخدك !!!!!!!

واختتمت قائلة "انا لحد دلوقتى مش مصدقة الطريقة اللى اتعاملت بيها وهل كل عميل بيروح يقفل حساب بيتعمل معاه كدة  اسوأ بنك وأسوأ فرع"