لوسي في حوار لـ"مصر تايمز": ذاكرت "الجن" في مسلسل "المداح" كويس.. كان بيحصلي حاجات غريبة في الفندق.. ودايما بحصن نفسي بالقرآن.. وحالتي النفسية اتدمرت.. وهذه طقوسي في رمضان
فنانة وراقصة محترفة، تألقت فى الكثير من الأدوار ما بين السينما والدراما، منها ليالى الحلمية بأجزائها الخمس، النوه، أرابيسك، زيزينيا وغيرها ، تجيد التلون فى جميع الأدوار لإخلاصها وإتقانها عملها، هى الفنانة القديرة لوسى.
تشارك لوسي فى الموسم الرمضانى الحالى من خلال مسلسل "المداح3"، لتقدم من خلاله دور الجنية “هند بنت الأحمر”، وتمكنت من خلال هذا الدور لفت الانتباه لقوة الشخصية وأدائها.
وأجرى "مصر تايمز" حواراً مع الفنانة لوسي، لتكشف لنا عن كواليس مسلسل المداح الجزء الثالث، وعن أزمة مسرحية الحفيد وطقوسها خلال سهر رمضان الكريم.. وإلى نص الحوار
في البداية.. ما الذى حمسك للمشاركة بمسلسل "المداح3"؟
لم أتردد عندما قرأت السيناريو تحمست لعدة أسباب لدور “هند بنت الأحمر” منها الشخصية شدتني جدا ونجاح المداح على مدار الموسمين وشغلي مع حمادة هلال أعرفه معرفة شخصية واحبه جدا وبحب شغله وبحترمه والورق مكتوب بعناية شديدة
حدثينا عن الجنية هند بنت الأحمر في "المداح"
هند بنت الأحمر مش بترمش بعينها خالص بتتكلم بشفايفها ومعندهاش كلام كتير ، التعبير بالعين وعضلات الوش أهم من الكلام، بالرغم من أن الحوار مهم بس بصة العين بتعبر عن حاجات كتير والعالم الخفي بيضحكوا ضحكة دمها تقيل مش تضحكي معاها
هل شعرتي بالخوف من الدور؟
وأنا بعمل الشخصية مكنتش عارفة الناس هتحبها ولا هتكرهها وبيقوليلي احنا بنخاف منك بجد، وحمادة هلال لما كنت بقف قدامه يقولي ماتقفيش قدامي أنا خايف منك، والحمدلله اتوفرتلي معظم الحاجات اللي احتاجتها وبحب ألعب الحاجات المختلفة والجديدة والحاجات اللي معملتهاش قبل كده
ماذا عن الملابس والمكياج ؟
باخد ثقة في الشكل الخارجي اللي اختاره المخرج والمكياج استقريت على كذه شكل وده في الاول والاخر نجاح وتوفيق من عند ربنا مستوى التمثيل في العمل هايل من صغير لـ كبير
كيف حضرتي لدور "الجنية"؟
كنت بفكر هعمل الدور ده إزاي لأني مش بعمل دور بشر أنا بعمل شخصية من العالم الخفي مذكور في القرآن وأنا ذاكرت وعرفت شكلهم بيبقى عامل إزاي في منهم طيب وشرير كان ده اللي بيهمني .
هل كان يحدث أمور غريبة أثناء التصوير؟
كان بيحصلنا حاجات غريبة في الكواليس فجأة تقوم عاصفة هوائية توقفنا عن الشغل ولما أروح أوضتي في الاوتيل أنا والماكيير نلاقي التليفزيون يقع حاجات كده غريبة لكن مش باخد في بالي لأن القرآن مش بيفارقني الحمدلله وبصلي دايما
كيف استقبلتي ردود الأفعال على المسلسل ؟
مكنتش بفكر في ردود أفعال الجمهور نهائي بس سعيدة جدا بردود الأفعال على السوشيال ميديا، والمسلسل أعلى ترند كده كده كان ناجح وشئ يشرفني إني اشتغلت في مسلسل زي ده.
هل أثر الدور على حالة لوسي النفسية ؟
فعلا عندي حالة نفسية مش بتكلم في البيت ومفطرتش معاهم بسبب إجهاد عصبي أنا حاسة بيه بسبب مشهد في الفيوم سافرتله مرتين تعبت
ما المسلسلات التي تتابعها غير “المداح”؟
أنا مش بقدر أتابع مسلسلات في رمضان ممكن أتابع برنامج أو اتنين وممكن أشوف الأخبار ومش عارفة اتفرج على المسلسلات لأني بحب أشوف الحاجة من أولها مش أجزاء منها وكمان انشغالي في التصوير .
ما هي طقوس لوسي في رمضان؟
أنا بقف في المطبخ بنفسي في رمضان أو خارج رمضان وبحب أعمل الأكل
أخيرا .. ماذا عن أزمة مسرحية “الحفيد”؟
لا أسمح بالتجاوز أو الخروج عن النص بألفاظ خارجة وخادشة أنا الموضوع اتفتح من تاني الأيام دي معرفش ليه ولاقيت الدكتور أشرف زكي بيكلمني وطالب يشرب معايا قهوة وأنا اتغلط فيا
