أحمد عيد: "الزمالك محتاج دفندر وصانع لعب.. وكنت بسقف لمرتضى لما بينجز" (صورة)

علق أحمد عيد عبدالملك لاعب نادي الزمالك السابق، على وضع الفارس الأبيض الحالي، وكتب على صفحته الرسمية لموقع التواصل الاجتماعي "فيس بوك": "أنا كل إللى يهمني استقرار الفرقة ونحافظ عليها وعلى اللاعبين، كنا بنعمل صفقات ونحاول نساعد الناس، بس مفيش حاجة تمت والميركاتو قفل هنعمل ايه خلاص". 

وأكمل: "الفريق عنده مباراة يوم السبت المقبل، وأنا عارف ومتأكد أن الناس بتشتغل والدنيا كانت فيها بعض المشاكل بداخل الفريق، من تجديد عقود وتعديل عقود وترضيات للمجموعة الموجودة كلها، واللاعبين في خلال الفترة دي هتاخد مستحقاتها القديمة اللى المفروض كانت اتدفعت من زمان والجديدة مقدمات العقود هياخدوها ودي حاجة مهمة".

وأشار: "القصة بقي بالنسبالي مش تعاقدات على الفاضي، الأهم هو المراكز اللي احنا عاوزينها مش كل اسم يتعرض عاوزين نجيبه، بالنسبالي انا او بمعني ادق احتياجات الفرقة دفندر وصانع لعب بس، وده اللي حاولنا نتحرك فيه الفترة اللي فاتت والدنيا باظت لعدم اقتناع باتشيكو بأمير عادل، وعارفين موضوع الشيخ باظ ليه، وموضوع عبد العاطي مفيش سيولة وفضلوا يأجلوا القصة لشهر اتنين".

وأتم: "اللي عاوز اوصله ان خلاص مفيش قدمنا أي حل غير الانتظار، والدوري يوم السبت والناس هتبان مين مع الزمالك ومين مع الاشخاص وانا ميهمنيش اي شخص كان موجود قبل كدة او موجود دلوقتي من الاخر مش هسقف لحد غير لما ينجز زي مرتضي منصور كان عندي مشاكل الدنيا والأخرة معاه و كنت بسقفله اما بيعمل حاجة حلوة للزمالك".

وعلى صعيد مختلف، قال أحمد شوبير في تصريحات إذاعية اليوم، "هناك العديد من الأمور التي تحتاج إلى توضيح من جانب إدارة الزمالك، هل بالفعل تقدم عبد الحليم علي باستقالته من عضوية لجنة الكرة، وهل بالفعل أيضًا استقال المستشار محمد عطية؟".

وأضاف "من الذي يتحكم في الأمور الخاصة بفريق الكرة؟ هل أيمن يونس أم مجلس الإدارة المؤقت أم البرتغالي جيمي باتشيكو، خاصة بعد التراجع عن إبرام عدد من الصفقات في الساعات الماضية مثل أحمد الشيخ وأمير عادل".