ميس حمدان: خالد يوسف هزقني لما رفضت أقدم مشاهد ساخنة
كشفت الفنانة ميس حمدان، تفاصيل ترشحها لبطولة فيلم ويجا للمخرج خالد يوسف، بدلًا من الفنانة دوللي شاهين، مُشيرة إلى أنها وقع خلاف كبير بينها وبين خالد يوسف بعد رفضها تقديم مشاهد القبلات بالفيلم، بجانب حديثها عن زواج شقيقتها الفنانة مي سليم، من الفنان وليد فواز.
وقالت ميس حمدان، خلال حوارها مع الإعلامية أميرة بدر في برنامجها VIP المذاع عبر شاشة قناة هي: خالد يوسف ممكن زمان كان في موقف حصل هو حمقي شوية في ردود أفعاله، هو كان عايزني في الدور بتاع دوللي شاهين في فيلم ويجا، وروحت المكتب بتاعه وكان في هاني سلامة، وكان بيقنعني بالدور وأنا ساعتها كان عندي تمسك فظيع إني مش هقدر أمثل مشاهد القبلات والمشاهد الساخنة في الفيلم، وكان بيقولي إنتي كده مش فنانة وبطلوا الطريقة دي، وأنتوا اللي بوظتوا الفن وزمان الفنانين مكانوا بيفكروا بالطريقة دي وكانوا محترمين برضوا، وهو ليه وجهة نظر وتُحترم، وأنا حسيت إني بتحط في زاوية قولتله طيب إديني فرصة أروح البيت أسأل ماما وأنا مكنش عندي الجرأة أعمل المشاهد دي، واعتذرت وقولتله أنا مش هقدر أعمل الدور ده، وزعل وهزقني وقالي بما معناه اللي زيي اللي بوظ الشغلانة.
وتابعت: الصحافة عرفت والخبر انتشر وأنا كمان قولت إني كنت هعمل الفيلم، وخالد يوسف كلمني وإداني على دماغي وقالي بما معناه إنتي عايزة تربطي اسمك بيا وتشهري نفسك، ومتجبيش اسمي تاني على لسانك ومتتكلميش عليا خالص، وخدت الكلام وسكت.
وردت ميس حمدان، على سؤال الإعلامية أميرة بدر، عن محاولة الفنانة هاني سلامة، إقناعها بالمشاركة في فيلم ويجا، قائلة: أكيد هاني سلامة حاول يقنعني مش فيلمه وهو اللي بيعمل المشاهد دي؟ وهاني من الفنانيين اللطاف جدًا وبجد نسمة.
كما علقت ميس حمدان، على زواج شقيقتها الفنانة مي سليم، من الفنان وليد فواز، قائلة: أنا بنسى أن مي أختي اتجوزت وليد فواز، ولما حد بيسأل مي اتجوزت كام مرة قالت مرتين قولتلها هي مرة، قالتلي لأ مرتين إنتي نسيتي؟ وأنا فعلًا نسيت.
وأضافت: الفترة اللي اتجوزت فيها مي وليد فواز فعلًا مُسحت، ووقتها متبسطش لما حصل ارتباط وكان عندي قلق وحسيته مش شبهنا، ولكن هي كانت حباه وهي حياتها بسيطة جدًا وعبارة من بيتها وشغلها وبنتها بس.
برنامج vip
برنامج vip يعرض يوميا خلال شهر رمضان على شاشة قناة "هي" وتقديم الإعلامية أميرة بدر، وذلك في تمام الساعة السابعة مساءً، ويستضيف البرنامج عددًا من نجوم الفن والرياضة.
