"فرحوا من غير دوشة".. تفاصيل أبسط حفل زفاف في ألمانيا
تداول رواد مواقع التواصل الاجتماعي صوراً لـ"عريس وعروسة" في ألمانيا قررا الذهاب إلى منزلهما عبر وسائل المواصلات عقب إتمام مراسم زفافهما في إحدى الكنائس.
"فرحوا من غير دوشة".. تفاصيل أبسط حفل زفاف في ألمانيا
وقال صاحب المنشور بموقع "فيس بوك" تعليقاً على الواقعة، "اللي في الصورة دول إتنين ألمان ، بعد ماعملوا فرحهم في الكنيسة وفرحوا مع صحابهم المقربين اللي هما ميكملوش عشرة خمستاشر فرد بالكتير ،خدوا بعضهم وقرروا يروّحوا بيتهم بالمواصلات زي كل مرة عادي الفرح كان فيه أكتر من عربية توصلهم وتأجير وشراء العربيات نفسه هنا رخيص جدا بالنسبالهم بس هما قرروا يروّحوا لوحدهم زي مابيروّحوا كل يوم".
وأضاف "وبالمناسبة البيت اللي رايحنله دا بيكون أوضة وصالة بالكتير ودا مش لأنهم فقرا أو مش عارفين يلاقوا بيت أكبر أو حاجة من دي لأ دول لأنهم في الوقت الحالي فعلا مش محتاجين أكتر من كدا ، وبعد مايخلفوا وابنهم يكبر بقا عادي جدا ينتقلوا لمكان تاني أو مدينة تانية حسب شغلهم هما الإتنين عشان يكسروا الروتين ويجددوا شغفهم للعيشة مع بعض مرة تانية!بغض النظر عن اتفاقي مع نظرتهم للحياة من عدمه بس دول الألمان اللي هما مفروض أغنى شعب أوربي واقتصاد بلدهم التالت ولا الرابع ع العالم! مش هكلمكم خالص عن شعوب دولة تانية معندهاش مشكلة خالص تقضي باقي حياتها مديونة عشان بس يكونوا مع بعض ! مش هكلمكم عن أفراح وارد جدا تكون بقيمة مرتباتهم هما الاتنين لعشر سنين قدام عشان يجيبوا أمة لا إله إلا الله تتفرج عليهم وهما عرسان".
