أمير هشام يفتح النار على رابطة الأندية بسبب أسوأ لقطة في الموسم
شن الإعلامي أمير هشام هجوماً عنيفاً على رابطة الأندية بسبب وضع درع الدوري المصري في "كيس قمامة" قبل مباراة الأهلي وحرس الحدود والتي انتهت بنتيجة 1 - 1، في المباراة التي جمعتهما مساء أمس بـ"ستاد القاهرة"، ضمن منافسات الدوري المصري.
أمير هشام يفتح النار على رابطة الأندية بسبب أسوأ لقطة في الموسم
وقال أمير هشام في تصريحات تلفزيونية، "درع الدوري التاريخي في أخر ظهور له يتحط في كيس قمامة، إيه المنظر ده وبتتكلموا عن التطوير والقرارات، مشهد لا يليق بسمعة الكرة المصرية ودي واحدة من أسوء لقطات الدوري المصري الموسم ده، رابطة الأندية هي المسئولة عن المنظر ده، اللي بيتكلموا عن التسويق والتطوير اللي عايز يسوق في 2023 يحط درع في كيس قمامة أسود".
وأضاف أمير هشام، "كان ممكن تحط درع الدوري في دولاب زجاج صغير في عربية مفتوحة والناس تشوفه وتصوره، مفيش تفسير للمنظر ده".
أمير هشام يفتح النار على ميدو: "أنت بالليل حاجة والصبح لما بتفوق حاجة تانية"
وفي وقت سابق، شن الإعلامي أمير هشام هجوماً عنيفاً على أحمد حسام ميدو، نجم نادي الزمالك الأسبق، بعدما أعلن الأخير تقديم شكوى ضد أمير هشام بعدما تحدث عن توقيع أحمد فتوح لاعب الفريق الكروي الأول بنادي الزمالك للنادي الأهلي.
وقال أمير هشام عبر برنامجه "بلس 90"، "أنت بالليل حاجة و الصبح لما بتفوق حاجة تانية، أنت شغلتك على المدفع ايه؟ أنا ولا بخاف ولا بتهز، أحمد حسام ميدو لمح في برنامجه في قناة عامة محايدة طلع من خلال برنامجه وهاجمنا بشكل كبير ومن خلال حسابه على تويتر بشكل واضح ، أنا عايز أسألك سؤال شغلتك على المدفع ايه ؟، أكلمك كأيه كإعلامي ولا كمسؤول ولا كمتحدث بأسم نادي الزمالك ؟".
وأضاف أمير هشام، "لو كإعلامي هسألك سؤال هو إلياس الجلاصي اللي في المصري اللاعب الجامد الزمالك تفاوض معاه ولا لا واللاعب نفسه أعلن في إحدى البرامج أن مدحت عبدالهادي كلمه، مع أن عقده كان لسه ممتد مع المصري حصل ولا محصلش ؟ حصل وهسألك بقى كمسؤول لما ده حصل أنت فين من الكلام ده ؟ ، حد قدم شكوى في مسؤولي الزمالك وقتها؟ لا أحمد حسام ميدو كإعلامي طلع وقال الشناوي عنده عرض من أهلي جده
هو الشناوي عقده خلص مع الأهلي المصري ؟ لا لسه عقده ممتد، هل هنلوم أحمد حسام ميدو عشان قال معلومة ؟ راجل بيقوم بشغله وبيحاول يجتهد ويقدم معلومة".
وتابع أمير هشام، "ليه لما قولنا معلومة في برنامجنا قمت بتقديم شكوى، أحمد حسام ميدو كان مدير فني في الإسماعيلي وهو مقدم برنامج منحاز للزمالك، في ازدواجية واضحة وتضارب مصالح في بعض الأمور، كإعلاميين لازم نبقى مسؤولين عن الأخبار اللي بنقولها ، لكن أحمد حسام ميدو في أخبار كتير جدا من خلاله بتتقال غلط وبالدليل والفيديوهات، مع الوضع في الاعتبار أنا مش هزعل من ميدو لسبب بسيط أنا مدرك جدا أن التوقيت اللي قال فيه كلامه عننا والتويته اللي ليها علاقة بينا كان بالليل وأنا عارف أن ميدو بالليل حاجة والصبح حاجة ، وأنا واثق أنه بيلوم نفسه بس لما فاق الصبح تاني يوم، لأن مهنيا متقدرش تقول عليا حاجة بقوم بشغلي كإعلامي اللي أنا درسته" .
واصل أمير هشام تصريحاته قائلاً، "خالد الغندور كان ضيف في برنامجنا ولمح لمشاكل كتير داخل النادي وظهوره معانا كان سبب في رجوعه لقناة الزمالك وبنفسه أشاد بمقدم البرنامج وأشاد بفريق العمل جدا أخر الحلقة ، خالد الغندور عنده برنامجين في الإذاعة وقنوات محايدة وفي نفس الوقت شغال في قناة نادي الزمالك دلوقتي بيهاجم البرنامج وبيقول أنه واخد توجه لأني أهلاوي وكنت في قناة الأهلي... البرنامج ده اللي عمل سبق في أخبار كتير تبسط نادي الزمالك قبل ما أنتو تعلنوا عنها لأن بمهتن وظيفتي وبسيب انتمائي على باب الاستديو أنا مهني ودرست المهنة وخريج إعلام".
واستكمل، "اتهامات موجهة ليا أني واخد توجه ضد الزمالك وعايز أهز استقرار النادي مع أن أنا قولت على فتوح أنه أفضل ظهير أيسر ودافعت عنه وأشدت باللاعب وقت كان النادي نفسه بيهاجم اللاعب، ودافعت عن أحمد الأحمر لما مسؤولي الزمالك هاجموه، وكنا أصحاب أخبار سارة لجماهير الزمالك وأعلنا عن تسوية المديونية ووضحنا بالتفاصيل".
واختتم أمير هشام تصريحاته قائلاً، "لو أنا واخد توجه هستضيف خالد الغندور طبعا لا مستحيل، فريق العمل عندي هيحاول قبل كده يتواصل مع أمير مرتضى وخالد لطيف لكن ملقناش رد ، ده دليل على أننا حاولنا والبرنامج ده مفتوح للكل، المشاهد سواء أهلاوي أو زملكاوي هو اللي يقدر يقيم وضيوفنا الدائمين محمد صلاح ووائل القباني وقولنا كتير الرياضة المصرية متنفعش من غير أهلي وزمالك، أنا في البرنامج لا عرضت سب وقذف ولا طردت حد لأن بحترم نفسي ومهنتي والمشاهد".
