انتصار: الست بتحبس جوزها في البيت ليه؟
انتقدت الفنانة انتصار مقارنات السيدات بين أزواجهن وأزواج صديقاتهن، موضحة أنه لا يجب على المرأة التدخل في اختيار أصدقاء زوجها.
وقالت انتصارخلال برنامجها التليفزيونى : ليه بتحطي نفسك في فك القرش وتحديات، وتحطي نفسك في منافسة إنتي مش قدها، وليه عايزة تحبسي جوزك هو عيل صغير؟ ليه تحطي نفسك في منافسة مع القهوة وحجرين شيشة؟، طبعًا هيختار الماتش والقهوة وحجرين الشيشة، وأقولك هيشتري القهوة، هيشتغل قهوجي وحسابات في القهوة علشان يوريكي أنه لازم ينزل القهوة.
واستكملت انتصار: ليه بتعملي له مقارنة بينه وبين ظروف الآخرين؟ ما هو صفاته مش زي صفاتهم، ليه تنكشيه هو هيشيل منك
لتعلق بدرية طلبة قائلة: لو حسستيه أنه أقل من حد في عائلتك إنتي هتدمري، ومينفعش تدخل في نوع أصحابه، متختاريش له أصحابه، لتضيف نوليا: هو مش ابنها علشان تختار له أصحابه.
وتابعت بدرية طلبة: لو الست عارفة أن النكشة دي هتوصل للطلاق، لازم تبقى واعية إمتى تتكلم وإمتى تطلب، وإمتى تشتكي وإمتى تقول كلمة حلوة، الراجل مهما كبر فهو طفل، وأنا جه وقت واعتبرت أن جوزي ده ابني، وعرفت إمتى أكلمه في مشكلة علشان نحلها مع بعض، وإمتى أطلب منه حاجة يعرف يعملها، والراجل طفل كبير ووصل لمرحلة أنه ممكن يغير من معاملتك لعيالك.
وأضافت انتصار: هي تدخل ليه في أصحابه الرجالة؟ إلا لو هيجره في السكة اللي يروح فيها ميرجعش، غير كده إنتي مالك؟، سيبيه ليه شخصيته هو حر مع أصحابه.
