بعد القبض على المتهم.. القصة الكاملة لـ يامن ضحية شقيق عروسة

كشفت الأجهزة الأمنية بمديرية أمن القليوبية تحت إشراف اللواء نبيل سليم مساعد وزير الداخلية لقطاع أمن القليوبية ملابسات ما تم تداوله متضمناً تعرض طفل للإصابة بعيار نارى خلال حفل زفاف بدائرة قسم شرطة الخصوص، وتم إتخاذ الإجراءات القانونية، وتولت النيابة العامة التحقيق.

وبسؤال والده قرر بأنه حال تواجد الطفل بشرفة منزل الأسرة بدائرة القسم وأثناء مرور حفل زفاف بذات المنطقة قام شقيق العروس (طالب - مقيم بدائرة القسم) بإطلاق عيار من فرد خرطوش كان بحوزته إبتهاجاً بحفل الزفاف فأحدث إصابه الطفل المشار إليها.

عقب تقنين الإجراءات تم ضبط المذكور، وبمواجهته أقر بإرتكاب الواقعة، وأرشد عن السلاح المستخدم فى الواقعة.

وكانت حالة مأساوية شهدها طفل صغير يدعى يامن بعد إصابته بخرطوش فى الوجه بسبب زفة عروسة أثناء تواجده فى شرفة منزله وقت إطلاق الخرطوش فى زفة العروسة 

وقال والد الطفل،" ده ابني "يامن" خمس سنين... كان فى زيارة لبيت جده تحت البيت كان ف الشارع هيصة وزفة.. يامن لما سمع الصوت راح يبص من الشباك فى نفس اللحظة اللى فيها واحد مجرم فى الزفة دى ضرب خرطوش من الشارع لفوق... يامن بص من الدور التانى يعنى ارتفاع مش اكتر من ٥ متر (وفي حارة عرضها ٣ متر) خد الخرطوش كله فى وشه والشظايا دخلت فى راسه وعينه وشه كله ودراعه الشمال... الواد فى لحظة بقى وشه عبارة عن مواسير دم بينزف منه غطت وشه تماما وجسمه والريسيبشن كله بتاع 8 متر غرقان دم.. مع صريخه وهو واقع ع الارض جريوا بيه على مستشفى جمبهم معرفوش يعملوا اى حاجه غير لف شاش حوالين دماغه واطلع على مستشفى تاني حكومي جمبه... راحوا بيه وجده كلمنى قالى اللي حصل جريت على المستشفى  دخلتله الطوارئ كان حواليه 3 دكاترة لما شفته عرفت انه خرطوش .. بلى كتير قوى فى وشه وعينه ودماغه الدكاترة قالولى الموضوع كبير قررت انقله فورا لمستشفى احسن شوية وطلعنا على مستشفى تخصصي كبير عمل اشاعات على المخ والعين والعظام ودخل دكاترة من كل التخصصات شافوا الحالة وعرضوها على استشاريين اللى قالوا انه العين سليمة!!... البلى ده مش محتاج تدخل جراحى والانسان بيعيش بيه تحت الجلد عادى رغم ان فى كتير منه دخل عظم الجمجمة وعينيه محتاجه شوية كريمات ومضاد حيوى فى البيت وهتخف.

وتابع " انا معجبنيش الكلام بصراحة ورغم ثقتى الكبيرة وثقة كل اللى حواليا فى المستشفى  دى ودكاترتها بس قلبى مطاوعنيش اروح بيه البيت فى الحالة دى روحت بيه مستشفى تخصصي تانية دخلته الرعاية وقالولي دكتور الرمد هيشوفه الصبح بس أفضل يبقى تحت رعايتنا بات الليله وجت الدكتوره الصبح قالت خلاص عينيه مش نافعة تانى!!!... والحالة دى مقابلتنيش من ٤٠ سنة!!... طب مفيش حل؟.. لأ!.. طب انقل عينيا ليه؟.. لا!!... جريت على مستشفى خاصة قابلني دكتور شاف الحالة قالى هادخله عمليات الصبح بس هاتكون عملية استكشافية فقط محدش يسألني فى رؤية.. خدت الولد وجريت على مستشفى خاص كبيرة.. كانوا رافضين يستقبلوه فى الاول اتحايلت عليهم عشان يقبلوه.. بالعافية وافقوا يبات فى الرعاية بالرغم ان فيهم ناس فى العلاقات العامة للمستشفى قالي احنا بنقبل كل العمليات ماعدا الحروق فقط المهم بات فى الرعاية والصبح جت دكتورة الرمد شافت الحالة رفضت تعمل اى حاجة لان الموضوع كبير واحنا مش مجهزين ولا هنا ولا  فى  الفرع التاني  للمستشفى.. طلعت على القصر العينى القديم الطوارئ عملوا اشاعات وفحوصات من الاول.. وكان التقرير المبدأي انفجار فى العين والساعه ٢ بالليل في قسم الرمد دخلوه عمليات العيون بعد مالدكتور قاللى برضو عملية استكشافية ومضمنش اى رؤية للولد حاليا خالص والموضوع كبير جدا وافقت طبعا لان مش قدامى اى حلول تانية... دخل العمليات وخرج حوالي الساعة ٦ صباحا كل اللى عملوه انهم خيطوا الفتحات اللى كانت فى القرنية عشان يوقفوا النزيف.. وحاليا هو فى المتابعة قسم الرمد والحالة مش مستقرة خالص.

وقال" من الحاجات الايجابية القليلة في المأساة دي سرعة استجابة الشرطة والمجرم اللي عمل كده هو وصاحب الفرح اتقبض عليهم في ليلتها وسلاح الجريمة اتجاب واتحرز واتحولوا على النيابة واتجددلهم 15 يوم اخر حاجة... واتمنى من كل قلبي وبحق كسرة قلبي على ابني ومستقبله اللي راح انهم ياخدوا اقصى عقوبة! ...علشان مهزلة استخدام الاسلحة في الافراح وسط البيوت لازم يكون ليها حل.. مش فاهم ازاي ناس عاوزة تفرح بأنها تعرض حياة غيرها للخطر.. ويارب يكون يامن ابنى اخر طفل يحصله حادثة زى دى الاطفال ملهاش ذنب!