آخرهم فادي خفاجة.. نجوم عانوا من هجران الوسط الفني
خرج الفنان فادي خفاجة في الأيام الماضية ببث مباشر على موقع الفيديوهات القصيرة “ تيك توك ” و هو في حالة انهيار و يشكو من تجاهل المنتجين و المخرجين له و عدم عرض أعمال فنية جديدة عليه، كما يتضح أيضا أن ليس الفنان فادي خفاجة وحده الذي كان يشكو من التجاهل، سبق و أن كثير من الفنانين تعرضوا لنفس المصير من قبله .
آخرهم فادي خفاجة .. أبرز النجوم الذين يعانوا من تجاهل
كانت قد كشفت الفنانة برنسة عبد الغني من قبل ببرنامج “ المنسي ” مع الاعلامية انجي هشام عبر قناة “ هي ” و قالت “ نفسي يشغلوني بدل ما هما مقعدني، ولجأت للدكتور أشرف زكي قالي انتي مش خريجة معهد قلتلوا بس انا خريجة خبرة ”
و قالت برنسة أيضا في لقاء مع “ صدى البلد ” : “ أنها تواصلت مع المكاتب المتخصصة والريجيسيرات، و دائما يلغونها بأن لا يوجد عمل متاح ” .
و أوضحت “ أنها تعيش بمفردها بعدما أجرت عملية لإزالة الرحم ولم تنجب أطفالا، وباعت كليتها من أجل إجراء عملية لوالدتها ” .
سيد صادق
كان الفنان سيد صادق قد وجه نصيحة للفنانين خلال مداخلة هاتفية بإحدى البرامج قائلا: لازم يكون عندك مجال أخر للرزق لازم تسعي علشان الرزق وعلشان متبهدلش ويقولوا عليك مش لاقي تاكل وبتشتغل سواق تاكسي.
كما تحدث عن الأعمال التي تعرض علية قائلا: في أعمال سينمائي بتتعرض عليا بيكون المنتج جاى ومتعشم اوي طيب اشوف اسم البطل اللي هيشيل الفيلم الاقي اسماء ضعيفة جدا جدا عشان كدة مش هقدم أى عمل لاني بكتفي بتاريخى واعمالى اللي قدمتها أنا وضعي مستور والحمد لله عيالي عايشين العيشة اللي كنت بتمناها لهم.
احسان الترك
كما بعث الفنان احسان التركي رسالة للفنان محمد رمضان من خلال تصريحاته التليفزيونيه الاخيرة حيث قال له : أنت فى مقام ابني وأخويا واشتغلت معاك كتير وأرجو تفتكرنى "، وذلك بعد قلة الأعمال الفنية التى تعرض عليه وعدم رد المخرجين عليه.
و يذكر أن الفنان محمد رمضان استجاب لاستغاثته و قرر اشراكه معه بمشهد في مسلسل “ جعفر العمدة ” و الذي عرض في السباق الرمضاني الماضي .
أحمد عزمي
كان الفنان أحمد عزمي كشف عن أسباب ابتعاده عن الفن و علق قائلا " من بعد ثورة يناير البلد كانت في فوضى كبيرة وعربيتي أتسرقت أكتر من مرة، ودا خلاني مبقتش قادر أواجه العالم؛ لأن أخويا اتقتل وكانت حادثة بشعة وأخد أكتر من 13 طعنة في خناقة، وفجأة حسيت إن مصر مش بتاعتي وانتقلت إلى شرم الشيخ".
وأكمل احمد عزمى: "فقدان التوزان في حياتي بدأ يزيد وبدأت أبعد عن كل حاجة واتكون حواليا مجموعة من الأشخاص ودخلت دوامة الكحول والترامادول، فضلا عن معاناتي مع الاكتئاب، وحدثت حادثة في شرم الشيخ وكان معايا ناس في عربيتي ولجنة وقفتنا وأنا كنت باخد أقراص مخدرة بـ روشتة والموقف مكنش كويس وكان معانا بنت مسجلة، والموضوع كبر وبقيت مكسوف من نفسي واتحبست 6 أشهر".
سيف عبد الرحمن
قال الفنان سيف عبدالرحمن من قبل خلال لقاء تلفزيوني ببرنامج «من مصر» عبر شاشة CBC:«إنه يتمتع بصحة جيدة ويستطيع العمل لكنه لم يتلق أي عروض نهائيا للمشاركة في أعمال فنية».
و أضاف “ أن هناك العديد من زملائه الذين امتنع عن ذكر أسمائهم، اضطروا إلى بيع سياراتهم الخاصة بسبب الظروف المعيشية الصعبة التي يعانونها في ظل عدم تلقيهم عروضا بالعمل رغم أنهم أسماء كبيرة في عالم الفن في مصر ”
كريم الحسيني
كما أعرب الفنان كريم الحسيني، عن استيائه الشديد من عدم مشاركته في الأعمال السينمائية والتلفزيونية بسبب تجاهل الصناع له رغم موهبته وإمكانياته الفنية.
وكتب الحسيني، معبرا عن غضبه عبر حسابه الرسمي على فيسبوك، قائلا: أنا تعبت بجد، جبت آخرى وطاقتى خلصت، ورغم إنى الحمد لله بشهادة الجميع فى عز توهجي على خشبة المسرح اليومين دول، وفى عز توهجي كمدرب تمثيل ودوبلاج وتمثيل إذاعي سواء على مستوى الورش أو على مستوى التدريس في الجامعه، لكن برضو من حقي أنا أقول أنى تعبت
وأضاف: ما بقتش قادر أتحمل، عارف أنى في نعمة، لكن أنا ممثل والله ممثل، بحب السيما والڤيديو واللعب بالشخصيات المتنوعة، بحب السيما عشان مُخلدة.
وتابع الحسيني:إحنا لحد دلوقتي بنتفرج على أفلام أستاذ فؤاد المهندس والريحاني ومدبولي أكتر ما بنتفرج على مسرحياتهم
واستكمل، قائلا: زمان وأنا عندى 15 سنة خدت ورشة تمثيل مع العبقرى الفنان سيد رجب، ساعتها قولتله أنت إزاى مش بتمثل، قالي أنا مفحوت مسرح وورش وكله على الله، بس أنا تعبت يا كريم، دلوقتي بقول نفس جملة سيد رجب، أنا تعبت وزعلان على طاقتي اللى بتروح مني وبتُهدر.
واختتم كريم الحسيني حديثة قائلا:أنا كنت ولازالت بحلم إنى أبقى زي النجوم محسن محى الدين، حسن يوسف، أحمد زكي، عادل إمام، محمود عبد العزيز، الفخراني، هرم زى الأهرامات دول، أنا ممثل، والله العظيم ممثل، دعواتكم بالله عليكم
راندا البحيري
ظهرت شكوى الفنانة راندا البحيري من خلال تعليقها على منشور فادي خفاجة الذي يشتكي من قلة العمل قائلة: “اه اتكتب علينا بالإعدام و مش المفروض نشتكي و لو اشتكينا يتقال لنا عييييب!!!! انا بسبب اني مش بمثل دخلت مشاريع علشان اشوف اي شغلانه تانيه وبيتنصب عليّ عادي جداً علشان انا عيشت عمري كله ممثله و مكنتش اعرف اني المفروض اتعلم حاجه تانيه او احس شغلانه تانيه علشان هييجي اليوم.اللي الشغلانه تقلب علينا عادي جدا كده”.
مها أحمد
قالت الفنانة مها أحمد و ذلك من منشور كتبته على صفحتها الرسمية عبر موقع التواصل الاجتماعي “ فيسبوك ” و علقت قائلة " لجأت لأحد اصدقائي كان زميلي وزميل زوجي، وكان بيروح عند جوزي في بيته وأهل جوزي كانوا فاتحين ذراعيهم ليه والعكس، مش عيب أني أتكلم معاه وأعيط وأقوله أني حزينة بسبب قعدتي في البيت، قولت لمجدي أنا هكلم زمايلنا اللي هما نجوم وأقول لهم إني عايزة اشتغل، قال لي متعمليش كده عشان متقلليش من نفسك، لكن أنا معملتش بكلام مجدي وكلمته وعيطت، وابتديت ادخل في مرحلة اكتئاب لأني عايزة اشتغل، بعد يومين لقيته بيكلمني يقولي في دور حلو اوي، قالي بس كلمي المخرج وافهمي منه، وده مينفعش عشان لازم هم اللي يكلموني، ووافقت وأنا كنت في ساعتها في أشد الاحتياج اني اشتغل، اتفاجئت أنه اتبعتلي دور غير اللي قالي عليه، ومكنش فعال ومليش لازمة في المسلسل".
وتابعت: "كان ممكن تقول لأصحابك شغلوا مها.. رحت طبعًا واستغربت جدًا عايزة أكلمه.. كنت قول لي إنه دور كومبارس ومش هزعل منك.. مكنش لازم أشحت كويس إنكم مترجمنها على إنها شحاته رغم أني كنت مترجماها على إنها سعي.. وبناءً على اللي حصل جالي اكتئاب وعيطت كتير جدًا، خلال تلك الفترة انا تعبت وأخدت أدوية ومازلت باخد الأدوية لحد دلوقت، شئ طبيعي لما ألاقي فيها حاجة بها رد اعتبار ليا، هتكلم وأكتب على صفحتي، وأنا كتبت بصراحة شديدة، ولا بشمت في حد ولا عايزة، ولو عايزة أشمت هشمت في نفسي أني أحسن من ناس كتير وقاعدة في البيت، ربنا كارمني أن أعمالي بتتعرض على الشاشة، ولسه في حكايات كتير مع زملاء كتير هحكيها".
فادي خفاجة
فادي خفاجة .. تصدر إسم الفنان الشاب فادي خفاجة، محرك البحث “ جوجل ” خلال الساعات الماضية، و ذلك بعد ظهوره في بث مباشر على موقع الفيديوهات القصيرة “ تيك توك ” وهو يشكو من قلة الأعمال الفنية المعروضة عليه، و انه قرر اللجوء الى الجولات و التحديات الخاصة التيك توك لكسب المزيد من المال .
فادي خفاجة يتصدر التريند بعد إنفعاله من قلة الأعمال
فادي خفاجة .. قال فادي خفاجة على صفحته الرسمية بتطبيق “ تيك توك ”: “مين معندوش أخطاء أجدع واحد في لايف هنا لو قعد ثانية مع نفسه هيلاقي نفسه كله أخطاء.. أقرب صديق ليا هو اللي بيهاجمني.. البني آدم الوحيد اللي كنت منتظره في غلطي يدافع عني ضربني في ضهري”.
وتابع خفاجة:" مهما قالوا متكلمش هتكلم عشان أقل حقوقي إني أشتغل.. لكن ما فيش فايدة أنا قاعد في البيت من غير شغل".
خرج فادي خفاجة أثناء قيامه باللايف بألفاظ خارجة للمتابعين، و انفعل على أحد أشقائه بعد أن طلب منه قفل اللايف قائلا “ أنت اخويا، نفعتني بايه، ده أنت مش عارف تدفع قسط عربيتك ” .
كان خرج فادي خفاجة، منذ 3 سنوات ليشتكى من قلة العمل، وخرج عبر حسابه بموقع التواصل الاجتماعي فيسبوك، وقال:" يا مخرجين ومنتجين مصر، لو العبد الله بعد العمر ده كله مشتغلش في مسلسل واتنين وتلاتة، مين اللي يشتغل يا ولاد المهنة والأصول؟، ممكن أتحدى أي مخرج أو أي شركة إنتاج بكفاءتي ودراستي وعمري وخبرت".
وتابع فادي خفاجة: 'والله العظيم لو قالولي بطلها لبطلها، مشكلتي إني واثق في نفسي بفضل الله، وربنا الحكم والعدل، ومطرح ما ترسي ندقلها'.
فادي خفاجة .. وسبق وأن خرج الفنان الشاب فادي خفاجة عن صمته ليشتكي من قلة عرض أعمال فنية عليه رغم ازدحام الماراثون الرمضاني 2022، كاشفًا أن الأمر أدى إلى إصابته باكتئاب.
فادي خفاجة .. وكتب فادي خفاجة عبر حسابه الرسمي على موقع التواصل الاجتماعي “ فيسبوك ” : "هو جيل التمانينات اتحكم عليه بالإعدام؟؟؟ طيب اعدمونا أحسن ما نموت كل يوم.. الواحد مر بكل مراحل الاكتئاب ومش عارف هيروح فين تاني، كل المسلسلات ديه ومبنشتغلش؟؟؟ طيب ليه".
فادي خفاجة هو ممثل شاب ولد عام 1982، و بدأ مشواره الفني في طفولته، و قدم العديد من المسلسلات أهمها “ ليالي الحلمية ”، “ المال و البنون ”، “ العرضحالجي ”، “ يوميات ونيس ”، “ ملح الأرض ”، “ العندليب ”، “ الجماعة ”، “ حواديت الشانزليزيه ”، “ الاختيار ”، “ قوت القلوب ” .
