سيدة بدعوى طلاق للضرر:"تبول عليا وضربني عشان رفضت أديه فلوس للمخدرات" (خاص)

أقامت سيدة تدعي "فريدة" دعوي طلاق للضرر ضد زوجها أمام محكمة الأسرة دائرة بولاق الدكرور، مطالبة فيها بالتفريق بينها وبين زوجها لاستحالة المعيشة؛ وذلك لقيامه بالتعدي عليها بالضرب وسرقة مشغولاتها الذهبية، لشراء المواد المخدرة وقيامه بالتبول عليها وإهانتها.

وقالت "فريدة" البالغة من العمر 28 سنة، في الدعوي التي تحمل رقم 1866 لسنة 2023:"من أول يوم جواز بينا وهو حنين وبيعاملني أحسن معاملة وبعد ما عرف أني حامل كان فرحان أوي ولكن محصلش نصيب وفقدنا الطفل في الشهر السادس من الحمل".

وأوضحت:"بعدها جوزي اكتئب جدًا وكان زعلان أوي أوي واتجه أنه يشرب مخدرات حاولت في البداية أكلم أهله محدش منهم كان بيقفله ولا هو كان بيسمع لحد نهائي.. لما كلمته براحة أنه لازم يبعد عن الطريق دا ضربني ودي كانت أول مرة يضربني.. وفي وسط كل دا فلوسي خلصت وهو اطرد من شغله لما عملوله التحليل الشهري واكتشفوا أن فيه نسبة مخدرات في الدم".

وتابعت فريدة أمام قاضي المحكمة:"صحيت من النوم ملقتش الدهب بتاعي ولا فلوسي ورماني في الشقة من غير فلوس وراح يشتري بيها مخدرات ولما رجع بليل بكلمه ليه عملت كدا لقيته شدني من شعري وفضل يضرب فيا وجرجرني علي الحمام وتبول عليا وتلفظ بألفاظ بذيئة وقالي اللي عندك أعمليه".

واختتمت الزوجة في دعواها:"الموضوع بالنسبالي بقي صعب خاصة بعد الموضوع دا  ومش هقدر أكمل خلاص عشان كدا لجأت لمحكمة الأسرة وأقمت دعوى طلاق للضرر ضده".