بتساوم العملاء علشان يقبلوا بالأمر الواقع.. مواطن يحذر من التعامل مع أمازون
حذر مواطن من الشراء عن طريق تطبيق أمازون واتهمهم بالنصب على المواطنين والمماطلة فى استرجاع الحق لأصحابه.
وقال صاحب المشكلة عبر السوشيال ميديا ،" أمازون بتنصب على العملاء وتساومهم بطول مدة الاستبدال علشان يقبلوا بالأمر الواقع!!أنا اشتريت السماعة دي k20 من أمازون لأني بشتغل أونلاين ومحتاجها ضروري لشغلي، المفروض إن السماعة بيكون معاها داخل العلبة الجزء اللى أنا عامل عليه دائرة، وده اللى بيخليها تشتغل على الكومبيوتر اللى أساسا شغلى عليه وللأسف الجزء كان متشال من داخل العلبة!، يعني السماعة زي قلتها مش هعرف أستخدمها".
وتابع "عملت استبدال واتصلت بخدمة العملاء، خلاصة اللى تم أنه وضعني بين خيارين كأنه بيتفاوض معايا! ؛قالي بالنص: يا إما أنتظر حدوث الاستبدال اللى ممكن يأخد أسبوعين أو 3 أسابيع لحين فحص المنتج على حد تعبيره، ووارد بعد كل ده إن المنتج يجي مرة تانية ناقص نفس القطعة لأن التعليقات على المنتج للأسف بتشتكي من نفس المشكلة، رغم إن البائع هو أمازون نفسه !!وطبعا ماينفعش أسترد فلوسي كاش من أمازون رغم إن المنتج غير مطابق للمواصفات!! هيبعتلي فلوسي على أمازون وأنا مجبر أشتري نفس المنتج ده، أو منتج تاني من على أمازون برضه!
وتابع عن مشكلته مع أمازون ،"طب أنا يا سيدي عايز فلوسي فى إيدي أشتري بيها منتج من مكان تاني أنا محتاجها!, لا شكرا مفيش!!!أو يحولي 50 ج على حساب أمازون وأشتري أنا الوصلة الناقص من على أمازون وسعرها هيكون مقارب للمبلغ ده وأوفر عليا وقتي وبكده هو ساعدني قولتله طب ماينفعش حضرتك تبعتلى الوصلة الناقصة مباشرة أو تسرع عملية الاستبدال وتضمن إن المنتج هيجي كامل؟ قالي لأ ده اللى أقدر أعملولك!وافقت مضطر على العرض التاني علشان فهمت أني مش هأخد منهم حق ولا باطل، ولما وصلت 50 جنية وقررت أشتري الوصلة الناقصة فوجئت بإن سعر نفس الوصلة على أمازون بنفس الخامة بعد التوصيل 180 جنية تقرييا!!، يعني هدفع 130 جنية فوق سعر السماعة اللى هي أصلا بـ300 جنية!!
بجد حسبي الله ونعم الوكيل!أنا مش عايز منهم حاجة، وعارف أني مش هاخد منهم حق ولا باطل، بس بنصحكم ماتكررش تجربتي ومهما كنت مشغول إياك تطلب من على أمازون، علشان لو حاجتك فيها حاجة هتتفاجئ إنهم بيفاوضوك فى حقك والله أعلم هتأخد حقك ولا لأ ولو أخدت فلوسك هتأخدها مش فى إيدك إنما على أمازون برضه، يا تأخد 50 جنية وشكرا على كده!!".
