شهيرة لـ " مصر تايمز ": ما يحدث فى فلسطين إذا تم تناوله درامياً يصنع أفلام كثيرة لعرض القضية
علقت الفنانة الكبيرة شهيرة على الأحداث الأخيرة بفلسطين في الوقت الحالي، و عن إمكانية تقديم القضية الفلسطينية بالسينما المصرية، و عن العوائق التي قد تمنع حدوث ذلك الأمر، و تعليقها على الانتقادات التي وجهت لمحمد صلاح .
تعليق الفنانة شهيرة على إعادة تقديم القضية الفلسطينية بالسينما المصرية
قالت الفنانة شهيرة في تصريحات خاصة لـ “ مصر تايمز ” : “ مش محتاجة كلام، لأن الدراما الفظيعة اللي حاصلة دلوقتي دي تعمل كذا موضوع و كذا فيلم على المآسي اللي بتحصل و المجازر اللي حصلت للمدنيين العزل دول، فيه ألف حاجة تتعمل منها حكايات مأساوية كتير عانى منها المدنيين الفلسطينيين، يعني هما جايين يحاربوا حماس ولا المدنيين، أنا مش فاهمة، و أكيد لازم يتعمل أعمال فنية كتير هتنظر لهذه المرحلة نظرة كبيرة و لازم تلقي الضوء عليها لإن ده دور الفن ”
وعلقت الفنانة شهيرة عن وجود عوائق تمنع تقديم القضية الفلسطينية “ فين العوائق هي الحرب خلصت ؟، إنما على مستوى الإنتاج على ما أعتقد مش هيحتاج تكاليف باهظة، و فيه حلول إن الدولة تشارك في الإنتاج مع أي شركة زي شركة المتحدة مثلا أو شركة تانية ”
وصرحت عن بعض التصريحات التي تقول بأن السينما المصرية لم تقدم القضية بشكل عميق قائلة “ ده حقيقي لأن القضية هي هي و الحرب اللي بينهم، و في النهاية مفيش حل و إسرائيل مسيطرة على الأرض و نزاع بقاله 75 سنة مفيش مادة، لكن أعتقد هيبقى فيه مادة درامية أوى تخلي المنتجين و الشركة المتحدة تفكر إنها تعمل عمل على الأقل يلقي الضوء على المدنيين و ما تعرضوا ليه من ممارسات وحشية و المجزرة اللي حصلت في كل بيت أكيد ليه حكاية و رواية ” .
أضافت عن رأيها في الوقفات الاحتجاجية للتضامن مع فلسطين “ الوقفات الاحتجاجية طبعا هتعمل تأثير في الموقف، الاحتجاجات دي بترفع حكومات و تنزل حكومات على مدار التاريخ، لازم يبقى فيه صوت مسموع لكل العالم، لازم يبقى فيه احتجاج على اللي بيحصل من ممارسات وحشية، لازم يجدولها حل عادل للقضية، لأنهم بيقولوا أصلهم اعتدوا، طبيعي لأن طالما فيه احتلال يبقى لازم فيه معركة لأن ببقى عايز أسترد أرضي ” .
و كشفت عن رأيها في الانتقادات التي وجهت لمحمد صلاح “ دي مهاترات مبحبش أتكلم فيها و مبحبش أشارك في الحاجات دي ” .
