يسري نصر الله لـ " مصر تايمز " : السينما مقدمتش كفاية عن القضية الفلسطينية
كشف المخرج الكبير يسري نصر الله عن رأيه حول إمكانية تقديم عمل فني يتطرق للقضية الفلسطينية بعمق، وتعليقه على تصريحات طارق الشناوي بشأن عدم تطرق السينما المصرية للقضية بشكل عميق.
رأي يسري نصر الله في تقديم القضية الفلسطينية من جديد بالسينما المصرية
وحول إمكانية تقديم القضية الفلسطينية بشكل أعمق يرى يسري نصر الله في تصريحات خاصة لـ “ مصر تايمز ” أن السينما المصرية أساسا مشكلتها أنها “مش عارفة تعمل أفلام”.
وتابع “ما أظنش إن موضوع فلسطين ده -مناسبات- يعني علشان مرور الأحداث الأخيرة نعمل فيلم، إلا إذا لو حاجة طالعة من القلب و عايز تعمل فيلم عن الموضوع ده، إنما هي مش توجيه إعلام يعني” .
و تابع “ لما اتعمل أصحاب ولا بيزنس و لما قدمت باب الشمس دي أفلام عملناها علشان كنا عايزين نعملها مش لأنها مناسبة أو مش بسبب أحداث مأساوية، وإن في الأحداث المأساوية إن الأفلام اللي زي دي لازم تتعرض و إنها توعي الناس بإيه اللي حصل أو إنها تلاقي موضوع تعرف تتكلم من خلاله عن الفلسطينيين و القضية الفلسطينية، و إن طول ما فيه احتلال لازم الناس تقاوم، إزاي تقاوم دي حاجة تانية، لكن مينفعش أجي أقول النهاردة لإن فيه أحداث بتحصل في فلسطين، يبقى على السينما المصرية إنها تعمل فيلم، و إن الكلام ده ممكن يتقال لوزارة الإعلام مش لمنتج أو سينمائي ”
وكشف عن رأيه في تصريحات طارق الشناوي بأن السينما المصرية لم تقدم فيلم يتطرق للقضية بعمق “ السينما المصرية تقدر تعمل ده و لازم تعمل ده إذا فيه ناس نفسها تعمل ده، و إننا مقدمناش كفاية عن فلسطين و علاقتنا بالقضية الفلسطينية، و إن المفروض نعمل ده بس السينما مبتتعاملش بالمفروض ” .
وعلق على وجود عوائق قد تمنع طرح القضية قائلا “ هو إنتاجيا فعلا صعب لإن علشان تعمل فيلم تتكلم فيه عن فلسطين و القضية الفلسطينية هيكون مكلف جدا ”
وعلق على ما أثير بأن السينما المصرية حتى وقتنا هذا لم تقدم فيلم عن فلسطين نستطيع من خلاله أن نقول أنه يلخص القضية و أن نخاطب به العالم “ أختلف جدا مع هذا الكلام ، لأن فيه أفلام اتعملت عن فلسطين و خاطبت العالم و اتعرضت في كل مكان في العالم و في مهرجانات كتيرة، و خدت جوائز و اترشحت للأوسكار” .
أضاف عن إمكانيته تقديم فيلم عن القضية “ مش بفكر في ده دلوقتي و إن الأول الناس تتفرج على فيلم باب الشمس اللي متعرضش بقاله 15 سنة، فيه جيل بأكمله مشافش باب الشمس و الزمن المتبقي و عمر بتاع هاني أبو أسعد، و إن فيه أفلام موجودة تتعرض و بعدين نبقى نتكلم نعمل تاني.
