عصام زكريا لـ" مصر تايمز " : لما السينما المصرية يتصلح حالها هتناقش القضية الفلسطينية وهتناقش كل القضايا
كشف الناقد عصام زكريا عن رأيه في طرح القضية الفلسطينية بالسينما المصرية نظرا للأحداث الأخيرة بفلسطين في الفترة الحالية .
عصام زكريا يكشف عن رأيه في تقديم القضية الفلسطينية
وأعرب عصام زكريا في تصريحات خاصة لـ “ مصر تايمز ” عن رأيه في إمكانية تقديم القضية الفلسطينية قائلا: “ المهم تتقدم إزاي، يعني يسري نصر الله لما عمل فيلم باب الشمس، عمل فيلم فيه مقومات الفن الجيد، يليق بإنه يتعرض في أي مكان في العالم، و اتعرض في مهرجانات كتير ولف العالم، فلما تعمل حاجة يعني متسيئش ليك زي فيلم ولاد العم ده فيلم اتعمل بطريقة مبتذلة وبروباجندا سخيفة وبغيضة حتى في إعلانها عن العداء، وفيلم الحب في طابا، يعني حاجات مش هتطلع برة الشارع اللي احنا قاعدين فيه يعني، ومش هتأثر على أي حاجة ”
وتابع “ اللي مطلوب دايما من الفن إنك مش تلعب على المشاعر علشان تطلع تصرخ و تعيط و تكره، دور الفن في إنه يخلي الناس تفهم، لما تفهم تعرف تتحرك و تعرف تفكر إزاي".
وأضاف “ إن أعظم الأفلام الفلسطينية اللي اتعملت مناقشتش القضية بشكل مباشر وبتناقشها بشكل إنساني أكتر، و إن السينما ممكن تعمل أفلام عن القضية بشكل إنساني”.
واستكمل “وإن عوائق الإنتاج هي جزء من المشكلة، والمشكلة كمان في الجمهور لإن الجمهور ممكن ينفعل لإن و أنت بتنفعل مع نشرات الأخبار غير و أنت بتنفعل مع فيلم لإن الفن دايما تأثيره بيكون أقوى على الجمهور".
وتابع “ أنا أتمنى طبعا إن السينما المصرية تعالج كل القضايا و كل الموضوعات، و إن لما السينما المصرية تنصلح حالها هتناقش القضية الفلسطينية وهتناقش كل القضايا ”
و واختتم “إن فعلا مفيش فيلم مصري اتعمل عن فلسطين يقدر يلخص القضية و نقدر نخاطب بيه العالم” .
