ماجدة خير الله لـ " مصر تايمز ": كل واحد له الحق في اختيار موقفه دون أن يزايد عليه حد
علقت الناقدة ماجدة خير الله على الجدل الذي أثير على الفنان محمد سلام و ذلك بعد أن اعتذر عن مسرحية “ زواج اصطناعي ” و الذي من المقرر عرضه بموسم الرياض تضامنا مع الشعب الفلسطيني .
ماجدة خير الله تعلق على اعتذار محمد سلام
قالت ماجدة خير الله في تصريحات خاصة لـ “ مصر تايمز ” بشأن اعتذار محمد سلام “ كل واحد له الحق في إنه يختار الموقف اللي يعجبه دون أن يزايد عليه حد ”
و تابعت “ يعني محمد سلام شايف إن هو مينفعش في عز الضرب و الناس بتموت يروحوا يعملوا مسرحية كوميدية و مضحكة، ويتجاهلوا الموضوع خالص، و لكن الآخرين بيقولوا إن الفن مش تهريج و إنه حاجة ليها قيمة و احنا دورنا إننا نمارس شغلنا في جميع الظروف ”
و أضافت “ دول شايفين الموضوع و متقدرش تقول مين صح، كل واحد بياخد الموقف اللي بيتناسب مع أفكاره و مبادئه دون أن يزايد على الآخرين يعني ميقولش أنا عملت الموقف ده و إن الآخرين سيئين لإنهم قبلوا ولا العكس، و المشكلة إن احنا مش قادرين لسه نحترم وجهات نظر بعض و مش بنحترم اختيارات بعض، كل واحد يقول لا ده ملوش حق و لا ده له حق ”
و استكملت “ لإن هو مبدئيا هو مأضرش بحد هو اعتذر عن عمل كان هيجيبله فلوس كتيرة، و هو مفهومه كدة إن ميصحش يعمل كدة و دي معتقداته، و أنا مش شايفة إن الناس تهاجمه يعني يهاجموه ليه يعني لا تهاجمه ولا تعمل منه بطل ” .
و صرحت “ الجدل المثار حول تأجيل الحركة الفنية علشان الموضوع بيتصاعد ، يعني الناس يمكن في الأول مكانوش متصورين إن هذا الموقف هيبقى لها التبعات دي، و إن بعض الناس بتردد إننا نعمل المهرجانات دي من غير الاحتفالات و يبدأوا في الأفلام على طول، لكن دلوقتي مش حاطين في بالهم إن الأجانب ذات نفسهم اعتذروا، يعني محدش عايز يضحي أو يجي منطقة هي أساسا قابلة للاشتعال في أي لحظة، فا هما اعتذروا فبالتالي المهرجان هيبقى فيه مشكلة، ف الناس للأسف بتتكلم من غير ما ينظروا للموضوع من جميع جوانبه، الحكاية مش عاطفية فقط مش إن ليه نعمل احتفالية و ناس بتموت، دي الحكاية أبعد من كدة و عمالة بتزيد كل يوم ".
