جمال العدل : نفسي أعمل فيلم ديني عن المرأة ومكانتها في الإسلام
حل اليوم المنتج جمال العدل، ضيفا في برنامج "حبر سري"، مع الإعلامية، أسما إبراهيم، والذي يعرض على قناة القاهرة والناس، وقال العدل: " أتمنى أعمل فيلم ديني عن المرأة ومكانتها في الإسلام ".
أبرز تصريحات جمال العدل
وأضاف: "هنيدي اللي بيعمل أرض النفاق الجزء التاني مش أنا وهنيدي و صاحبي وعشرة عمر، واتغاظت لما نزل صورة وكلمته علشان أفهم منه مردش عليا، ولو اتعمل الجزء التاني مش هينجح ، إيرادات هنيدي مش معناه إنه شطب ممكن يكون كان نازل في وقت غلط، وده بيكون ظروف سوق وسوق سينمات" .
وتابع: " محصلش قبل كدة إن ممثل بعد ما بدأ معايا ووصل للنجومية ويجي يتشرط عليا بعد كدة في الشغل وصعب أقبل اللفظ نفسه وإن الشغلانة دي ليها أعراف بنمشي عليها وهي إن المخرج هو رب العمل " .
واستكمل: " الشخص الوحيد اللي أحب أعتذر له هي يسرا علشان حدث خطأ غير مقصود لما قولت إن مسلسلها معجبنيش ويسرا هي أهم شخص في تاريخ العدل جروب " .
وأوضح: " كريم عبد العزيز هو النجم الوحيد الل يعتبر رهان كسبان في السينما المصرية وأنا بحبه جدا على المستوى الفني والإنساني ومحترم جدا ومتواضع وهو بحق وحقيقي في كل حاجة "
وصرح: "ومتصور إن أعلى أجر وأعلى إيراد كريم عبد العزيز، وفي السيدات حلي يسرا طبعا على جنب وبعده نيللي كريم ومنى زكي " .
واستكمل: "غياب عبلة كامل وإنها مش هتمثل تاني ده توقع أقرب إلى معلومة وهي أكتر من أختي وفي عز ما كانت بتمثل كان الوصول إليها صعب جدا " .
واستطرد: " أجور الفنانين القائمة اللي ظهرت غير صحيحة ومش عارف ده من مصلحة مين، وعايز أقول للجمهور فيه مجموعة من الممثلين الرائعين مش لاقيين ياكلوا، الفنان هو عبارة عن مشروع بيسوق لنفسه وده بيكون بناء على قانون العرض والطلب " .
وأوضح " فيه مشروع مع يحيي الفخراني في رمضان اللي جاي ويعتبر عودة مجدي أبو عميرة وهيكون معانا جومانا مراد في المسلسل " .
وتابع " فعلا فيلم ع الزيرو أقل إيرادات أفلام محمد رمضان في مصر لإن جمهور محمد رمضان في السينما جمهور العيد مع إنه عامل إيرادات كويسة في الخليج، بس يكفي ردود الفعل الإيجابية ويعتبر عودة العدل الجروب للسينما بسطاني " .
وأشار إلى أن "المنتج مظلوم جماهيريا وإعلاميا في مصر، المنتج عند الجمهور بيبقوا فاهمين إنه عنده فلوس ولكن الأهم إنه يكون عنده رؤية اللي هو هقدم الفنان إزاي لإن منتج عن منتج يفرق ".
ولفت: " محمد سعد استهلك نفسه زيادة عن اللزوم لكن هو فنان رائع ممثل موهوب وشاطر جدا بس محتاج يتم إدارته بشكل أحسن من الشكل اللي بيتم إدارته.. ومتخانقتش مع نيللي كريم والعلاقة اللي بيني وبينها تعدت مرحلة الشغل وأنا اللي مجوز نيللي كريم أنا كنت وكيلها في فرحها، ومفيش زعل بيني وبينها " .
