مش قد العروض ماتعملوهاش.. مواطن يحذر من التعامل مع " قصر الكبابجى"
حذر مواطن من التعامل مع مطعم قصر الكبابجى، مستعرضا تجربته وقال " أسوء تجربه مع قصر الكبابجي - Qasr ElKbabgi فرع التجمع الخامس ولا أنصح أحد بالتعامل مع المطعم ده..المطعم مشكوراً عامل عرض خصم 50٪ على الساندويتشات كنوع من أنواع الدعايا للمطعم..وعلى الرغم من أن سعر الساندويتشات بعد الخصم تعتبر مقاربه لأسعار مطاعم تاني ولكن قولت نجرب مش هنخسر حاجه.
وتابع صاحب المشكلة عبر السوشيال ميديا،" طلبت الأوردر الساعه ٢:٣٨ عصراً وأثناء الطلب الكاشير قالي الاستلام الساعه ٥ المغرب، ليه يافندم كل ده !!!؟؟؟ قال علشان في ضغط على الطلبات وأكدت عليه أنه مش هيتأخر عن كده قالي ٥ بالظبط يكون جاهز..مشيت ورجعت المطعم في ميعادي الساعة ٥ بالظبط ولحد الساعة ٦ مساءاً الاوردر مكانش جهز فإضريت بعد كل الانتظار ده اني ألغي الأوردر لأني مش منطقي أبداً أقعد كل ده مستني شوية ساندويتشات وفي أطفال في البيت مستنية تتغدى".
واستطرد ـ" 3 ساعات وثلث المطعم بيجهز في ساندويتشات !!!؟؟؟ ليه بيخترع الذرة في المطبخ جوه ؟؟؟ مهما كان في ضغط شغل مافيش أبداً مبرر للتأخير ده كله.والأسوء والأسوء أسلوب المدير المحترم اللي واقف بقوله ميعاد استلامي الساعه 5 ودلوقتي الساعة 6 وأنا مرتبط بمشاوير، يرد بإسلوب غير محترم يقولي {وأنا اعملك إيه، مانت شايف في ضغط شغل لو وراك مشوار روح مشوارك وارجع استلم الأوردر} وكأننا بنشحت منه الأكل.المفروض مطعم زي ده مش مطعم صغير علشان تكون الخدمه فيه كده وأسلوب اللي شغالين فيه بالمستوى المتدني ده طالما مش قد العروض يبقى ماتعملوهاش أحسن..بصراحة تجربة مش هتتكرر أبداً ولا انصح أحد بالتجربة.. طالما مش قد العروض ماتعملوهاش
وتفاعل عدد كبير من رواد السوشيال ميديا مع منشور الشخص ، ومنهم من قال "خير ما عملت طلبت منهم من سنتبن تقريبا كباب و كفته و كانوا اغلي من الدهان و ابو شقره و مش هاين عليهم يحطوا طبق طحينه الوجبه كانت معديه الـ1200 جنيه من سنتين اتصلت بيهم اشوف ليه كده قال لي حضرتك مطلبتيش حلفت عمري ما هطلب منه تاني لو آخر مطعم في مصر".
