وزير النقل عن حادث محور كمال عامر: طالبوا بإعدامى.. والكوبرى موقعش والله

رد الفريق كامل الوزير وزير النقل لأول مرة، على ما تردد حول انهيار محور كمال عامر، قائلا: أنا آسف بس مش عاوز أقول في شوية ناس مش بيفهموا ولكنهم يرموا شوية تراب على الحاجة الحلوة.

وأضاف خلال مداخلة هاتفية مع الإعلامي أحمد موسى، مقدم برنامج على مسئوليتي، المذاع على قناة صدى البلد، الناس إمبارح قالوا ألحق الكوبري وقع واعدام كامل الوزير وصرف 2 مليار جنيه على الكوبري ووقع.

وأردف كامل الوزير، وزير النقل، أنا المسئول عن كل كباري مصر ولكن مفيش حاجة انهارت ولا وقعت، و اللي اتقلب الكمر كانت على ونش بيركبها وكانت بعيد عن الشارع في آخر منزل للكوبري اللي شغال تجريبي ولا تشكل خطورة على الناس.

واستطرد أن كمر خرساني فقط وقعت وكمان مالت على جمبها واتقطمت ووقعت في المكان المحدد للعمل ومن توفي العامل المسئول عن تصبين الكمر الخرساني فقط، قائلا: افهموا وبصوا وحللوا واعقلوا وشوفوا أيه يتقال وأيه ميتقالش . 

وواصل الفريق كامل الوزير وزير النقل، أن الكوبري لم يتم افتتاحه بعد وإنما شغال تجريبي والرئيس السيسي هيشرفنا في مرة لافتتاح كل المشروعات في المنطقة.

واختتم: مهما نقول اللي كارهينا كارهينا وربنا يهديهم ويقدرنا ونعمل حاجات كتيرة لبلدنا تحت إشراف رئيسنا في الولاية اللي انتخبه فيها الشعب الأصيل اللي فاهم .