صبري إسكندر: أنا منسي أوي.. وكنت أتمنى أشارك في مسلسل جعفر العمدة
أكد الفنان صبري إسكندر، أنه توقع انتشاره بصورة أكبر بعد مشاركته في مسلسل الأطفال عالم سمسم، بجانب الكشف عن أمنيته في عمل الفوازير، والمشاركة في مسلسل جعفر العمدة.
صبري إسكندر: أنا منسي أوي.. وكنت أتمنى أشارك في مسلسل جعفر العمدة
وقال صبري إسكندر، في تصريحات تليفزيونية: أنا منسي أوي، وكنت متوقع أن يكون في انتشار أكبر بعد عالم سمسم، ولكن مجاليش إحباط، ومسرحية كعب عالي كنت عامل فيها دور متميز ولكن متصورتش، ولو كانت اتصورت كنت هبقى في منطقة تانية لأن طلع منها نجوم زي محمد سعد.
وعن الأدوار التي تمنى تقديمها، فقال صبري إسكندر: أنا كنت بشوف الفنان حسن حسني في أدوار كتيرة هو فنان عملاق، كنت بشوف نفسي معاه ومكانه، ومكنتش هعمل أكتر من اللي هو قدمه، وفي شخصيات كتير مرموقة بشوف نفسي مكانهم في الأعمال، وشُفت الفنان محمد رمضان في مسلسل جعفر العمدة، وشُفت نفسي معاه في شخصية أخوه كان ممكن أقدمها، وأحمد فهيم عمل الدور ببراعة.
وتابع: كان نفسي أعمل حاجة فنية زي الفوازير وهتدي قيمة وثقافة ورقي، وحلقات زي اللي عملها المرحوم أنور وجدي وأنا بحبه وهو جوايا، وأنا بدور على بنت صغيرة زي فيروز، تعمل معايا الحلقات.
وأضاف: نفسي أعمل حاجة أسرية، الأسرة راحت فين؟ الأب والأم بيشتغلوا والاولاد مرمين عند الجيران، زمان كان في حاجة اسمها لم الشمل، ودلوقتي مفيش حوار بين الأبناء ولآباء، نفسي نبني أسرة من جديد، إحنا لازم نربي نفسنا الأول علشان نعرف نطلع جيل كويس.
