صبري إسكندر: مشُفتش أبلة فاهيتا ولو هدفنا الضحك هنطلع جيل تافه
كشف الفنان صبري إسكندر، عن رأيه في الدمية الشهيرة أبلة فاهيتا، بجانب الكشف عن أمنيته في عمل مسلسل أطفال مثل الراحل أنور وجدي.
وقال صبري إسكندر، في تصريحات تليفزيونية: أي وطن عايز يبني جيل ابني صح، ابني قيم ومبادئ وأسسه، هدفي إيه في الحياة أضحك ولادي ولا أديهم قيمة؟ لو ضحكتهم ضيعت القيمة وهيطلع جيل تافه.
وتابع: أنا للأسف مشوفتش البرنامج نظرًا لأن شغلي بياخد وقتي، ولكن عايز تبني بلدك أكتب كويس وطلع صورة كويسة للمجتمع، يبقى عندي جيش بطلع رجالة، إنما يبقى عندي جيل للضحك فقط؟، إحنا ليه نسينا الفن الراقي بتاع زمان من غير أي افتعالات ضحك.
وأضاف: أنور وجدي مثلي الأعلى، وأمنية حياتي أعمل حلقات لأنور وجدي مع بنوتة صغيرة نطلع منها قيمة، ومكتوبلي فوازير وأصحابي قالولي بعد فؤاد المهندس أنت ملك الأطفال، ولو عملت فوازير هتكسر الدنيا.
أما عن صورته في المترو التي تصدرت التريند خلال الفترة الماضية، فقال صبري إسكندر: الصورة بتاعة التريند كانت صدفة، اللي صورهالي هو أفادني وأساء ليا، وإحساس حب الناس ليا أسعدني، وأساء ليا لأنه كان المفروض يقولي هصورك فأقعد كويس وساعتها كنت في مصر الجديدة ورايح في وسط البلد، وكان في مشكلة بفكر فيها ومش واخد وضع التصوير.
