بنشر صور لعائلتها.. والد ياسمين صبرى يرد على تصريحاتها بشأن الطبقة المتوسطة
علق أشرف صبرى ، والد الفنانة ياسمين صبرى على تصريحاتها بإنها كانت تنتمى للطبقة المتوسطة ، ونشر صور لها ولأشقائها وعلق قائلا،" بعد الواحد ما كبر ويشوف ولاده يحمد ربنا اتربوا كويس رغم اننا طبقة متوسطة عاشوا في بيت ابوهم وبناتي كانوا في مدرسة EGC بتاعة الطبقة المتوسطة كنت مهتم تكون مربيتهم فيلبينية عشان يتكلموا اللغة الانجليزية كويس بتاعة الطبقة المتوسطة اشتغلت طبيب واتعلمت بره عشان انجح اولادي في الطبقة دي وابني كان في مدرسة فيكتوريا".
وتابع،" دلوقتي ابني في امريكا بيشتغل بعد ما جوزته الحمدلله ونرمينة بنتي جوزها دكتور زيي بس اطفال من الطبقة المتوسطة والتانية فنانة وعندي بنت فرنساوية كنت بافسحهم دايما في اليخت بتاعي الصغير بتاع الطبقة المتوسطة! ولما باتفرج علي حفيدتي اما بافرح ومنتظر عم بلال يجيب ولي العهد يارب".
واستطرد، " كلهم بيحبوا ابوهم والكسندرا حتتجنن وتيجي مصر لانها مع امها في فرنسا عشان تعد مع ابوها وهي الوحيدة البعيدة لكنها لها ام محترمة تعرف تخلي ابوها رمز حتى لو بعيد ومنتظر وصولها بفارغ الصبر احيانا يطلع عيل من عيالك براوي وناكر للجميل ويتكلم كانه بيمثل فيلم كله اختراعات لكن دي سنة الحياة..المهم انهم كويسين وبخير واحب اوضح اننا كنا سعداء في الطبقة المتوسطة دلوقتي الحمدلله انتقلنا الي الطبقة الاقل من المتوسطة وربنا يستر ما ننزلقش الي تحت الارض".
وكانت ياسمين صبرى قد قالت فى تصريحات مع عمرو أديب ، فى بودكاست بيج تايم إن النجاح الذي وصلت له في حياتها المهنية قدرها، ليس بسبب الحظ أو الذكاء، وحياتها لم تكن سهلة فهي من أسرة متوسطة وجدتها هي التي تولت تربيتها، والتحقت بمدارس حكومية في بداية حياتها التعليمية ولكن مع تحسن الظروف المادية لوالدتها انتقلت إلى مدارس أخرى، "وهو ما جعلني أعيش مع كل الطبقات"
