بهجت عدلي: سيبت الصيدلة من 22 سنة واتجهت للفن.. ومبحبش أظهر في الإعلام
تحدث الفنان بهجت عدلي، عن تفاصيل دخوله الوسط الفني، بجانب الكشف عن سبب قلة ظهوره إعلاميًا.
وقال بهجت عدلي، خلال تصريحات تليفزيونية : أنا مبحبش اللقاءات والإعلام لأني بحس أن المتفرج مش عايز يشوف الفنان قاعد وبيتكلم، عايز يشوفه في عمل فني ودي وجهة نظريويمكن تكون غلط، ولكن أنا بداية كانت مع الأستاذ الكبير حسن حسني واتطلب في لقاء ورفض، وقال المتفرج مش عايز يسمعني هو عايز يشوفني بس.
وتابع: كنت بتمنى من صغري أني اشتغل في الفن، وظروف الأهل لأني من الصعيد وكنت في ثانوية عامة وجبت مجموع كويس دخلني كلية الصيدلة، ومكنش ينفع أقول لوالدي أني عايز أدخل معهد فنون مسرحية، خاصة أنهم عملولي صيدلية وأنا لسة طالب في الكلية على أساس أني أشتغل فيها بعد ما أخلص كلية.
وأضاف: كلية صيدلة جامعة أسيوط عملت مسرحية واحدة في تاريخها كانت إخراجي وبطولتي كان اسمها البرشام ممنوع، في فترة كان استحالة تعمل نشاط فني في أسيوط، وأنا كنت حابب ده ولما الفرصة جت في إديدي وخلصت صيدلة والجامعة دخلت التمثيل بقالي 22 سنة ماليش في الصيدلة خالص.
