أحمد العوضى: مفيش حد "نمبر 1" ولو دامت لغيرك مكنتش تجيلك
قال الفنان أحمد العوضى، "عمرى ما دخلت صراع "نمبر وان" ومافيش حد رقم 1 فى المطلق، الواحد هو الله، وغير كدة كله فى الأونطة، مافيش حد رقم واحد طول الوقت مافيش حاجة اسمها كده، لأن دى مش عدالة الدنيا، فى أساطير اتنسوا"، مضيفا قائلا " ربنا كان ليه عليا فضل أن مسلسل "حق عرب" يكون رقم 1 وبفضل دعوات الناس ليا، أنا راجل ناجح ومسلسلى ناجح، لو دامت لغيرك مكنتش تجيلك".
وأكد الفنان أحمد العوضى، أنه لم يقصر فى حق ياسمين عبد العزيز ولا هى لم تقصر فى حقه، قائلا: "محدش فينا قصر فى حق التانى، أو كان وحش مع التانى، واللى حصل قضاء وقدر، وحبى لها حسيته من جوايا، وبقول الحقيقة، وده ميقللش من حد دخل فى حياتى".
وأضاف أحمد العوضى، خلال حواره ببرنامج "ع المسرح"، مع الإعلامية منى عبد الوهاب، على قناة الحياة، أن ياسمين عبدالعزيز جدعة وستظل بالنسبة لى حاجة كبيرة فى حياتى، وحبى لها لم ينته، وانتهاء الزواج فراق وده أقدار".
وتابع، أحمد العوضى، "انفصلنا على قد احترام الناس لينا واحترامنا للناس، علشان لما الناس تشوف منك الحاجة الحلوة والسعادة بتبقى قدوة وانك بتصدر طاقة حلوة".
وكان الفنان أحمد العوضي، قد تحدث فى الجزء الاول من البرنامج عن الفنانة ياسمين عبدالعزيز، رغم انفصالهم، مشيرًا إلى أنها حب حياته الحقيقي.
وقال ،"ياسيمن عبدالعزيز هي أصدق حب، هي الحب الحقيقي والوحيد في حياتي عشت معاها أيام بفترات بمواقف بمراحل"
وقال الفنان أحمد العوضى، "كل مسابقة بقدمها على صفحتى ربنا بيعوضنى كتير بيها، منها الدعوة من حد غلبان متستهونش بيها وهى أبرك من 1000 واحد يهاجمنى، لافتا إلى أنه لم يرد على من اتهموه فى موضوع التعاطف مع صاحب واقعة "الكشرى" وعمرى ما رديت على حد هاجمنى".
وأضاف أحمد العوضى، خلال حواره ببرنامج "ع المسرح"، مع الإعلامية منى عبد الوهاب، على قناة الحياة، أن صاحب واقعة الكشرى كانت مشكلته على الملأ فجبرت بخاطره، وانا عمرى ما أندم على خير عملته، ولا قولت اتقى شر من أحسنت إليه واللى يقول عليا حاجة يقولها واحترامه على راسى".
وأكد أحمد العوضى، عمرى ما رحت لدكتور نفسى، وبحل مشاكلى بنفسى والحمد لله، مشيرا إلى انه كان ملاكم واشتغل مع الفنان نور الشريف وكان مثله الأعلى وذهب عنده عشان يشوفه بس، فأخذه، وانا اتخرجت من مدرسته، وبطبعى مش رومانسى، وبكره الرومانسية اللى فيها تلزيق، وبحب الرومانسية تكون برجولة، والراجل لازم يكون راجل فى كل حاجة".
