أغنية "شكرا" للهضبة تشعل الخلاف بين رامى صبرى وعزيز الشافعى .. والأخير: اتهاماته كذب ومش هشتغل معاه تانى .. وتامر حسين: ليه بنقحم اسم عمرو دياب فى جُملة مفيدة
الأربعاء 06/يناير/2021 - 08:04 م
قرر المطرب رامي صبري عدم التعامل مع الملحن عزيز الشافعي في أى عمل غنائي آخر، وصرح بذلك عبر حسابه الرسمي على موقع التواصل الاجتماعي "انستجرام".
وكتب "رامي": "لتاني مره الملحن عزيز الشافعي ياخد أغنية مني، وإحنا شغالين فيها ويديها لفنان تاني وهو الفنان عمرو دياب بنفس الشكل التوزيعي والموزع أغنية شكرا كده للي سبنا ،أغنية زى مانتي ،لذلك قررت عدم التعامل معه مره آخرى".
ورد الملحن عزيز الشافعي على اتهامات رامي صبري له عبر حسابه على "فيسبوك"، قائلًا: "مش هرد بالتفاصيل على كلام الزميل المحترم ، عشان لما الواحد يبقى ليه فضل بعد ربنا ف نجاح فنان و بيزود رصيده مع الناس، بيعز عليه بعد كدة يقلل منه حتى لو تجاوز".
وأضاف: "رغم إن كلامه كله (مالوش أي اساس من الصحة)، احب دايما اشوفه ناجح و بيكمل اللي عملناه"، وتابع مشيرا إلى أن قرار عدم تعاونهم في عمل غنائي آخر هو قراره مسبقا: "بشكره على إستجابته لطلبي و قراري الشخصي الي بعتهوله الصبح من خلال صديقنا المشترك محمد حامد بإننا منشتغلش تاني و نكتفي بنجاحاتنا".
وختم حديثة، قائلا: "وبعتذر للسادة الصحفيين اللي بيتصلوا بيا، مش عايز ادي الموضوع أكبر من حجمه وبكتفي بالبوست ده وبالكلام المحترم اللي كتبه زميلي وشريكي تامر حسين على صفحته عن أغنية شكرا، اما بخصوص أغنية زي مانتي، ممكن ترجعوا للصديق المشترك محمد حامد و تسألوه، شكرا لحد كدة".
ومن جانبه علق الملحن تامر حسين على الخلاف الواقع بين رامي صبري وعزيز الشافعي عبر حسابه "فيسبوك"، قائلًا: "أولا ليه بنجيب وبنقحم دايماً اسم (عمرو دياب) فى جُملة مفيدة؟ ايه الغرض ؟"، مضيفًا: "ثانياً.. توقيت البوست لما الأغنية انتشرت وكسرت الدنيا، بالتفاعل وإقبال الناس عليها والإشادة بيها يعنى ليه الكلام ده مكنش فى أول يوم مثلاً؟ ده لو فعلاً الكلام على حق".
وتابع "حسين"متضامنًا مع الملحن عزيز الشافعي: "ثالثًا.. اللى اتعلمته ومن أدبيات المهنه ولازم الناس كلها تفهمه فكرة الذوقيات يعنى ايه ؟ يعنى نبارك لبعض نهنى بعض مش نتهم الناس فى عز نجاحهم بالباطل، لما أى مُطرب فى الدنيا بتعجبه أغنية المؤلف والملحن بيعملوا (تنازل عن حقوق الإستغلال ) للمطرب، طالما ماحصلتش الخطوة دى من زمان تبقى الأغنية ملك الشاعر والملحن لحين إختيار الأفضل، وارد جداً تسمع مطرب زميل أغنية من سنة سنتين ولضعف الرؤية الفنية مايتخيلش نجاحها ده اللى بيفرق، مطرب عن مُطرب ف سُرعة إتخاذ القرار أنا شايف إن فى تجنى على حق المُلحن عزيز الشافعى أدبياً ومعنوياً دى شهادة حق".
وأضاف: "ومش شايف تماماً اى داعى يسمح بالكلام والصراعات دى، وللمرة المليون الناس المُحترمة ما تعلنش مشاكلها فى العلن، عيب فى خصوصيات مايصحش ندخل الجمهور فيها ونتهم ناس محترمة بالباطل أكيد مش هنزل فويس نوت نستشهِد بيها واحنا (أصحاب الحق)، وربنا يهدى".
وختم حديثة، قائلًا: "وأخيراً ياما ناس سمعت أغانى من سنة وسنتين ومكنش ليهم نصيب فيها ماعملوش اللى بيتعمل ده لما الأغنية تنجح، بالعكس فرحوا واتمنوا إنها ياريت لو كانت أغنيتهم بكل حُب وتقدير وروح حلوة، وده بوست بكُل حُب والله عشان معنديش كلام يتقال تانى مش عايزين الموضوع ياخد أكبر من حجمه، هى شُهرة للأغنية أكتر بس مابحبش الطريقة دى من الشهرة".
