أفشة: جمهور الأهلي بيدي طاقة متتوصفش.. والله يسامحك يا عارضة
علق محمد مجدي أفشة نجم النادي الأهلي عقب التتويج بلقب دوري أبطال إفريقيا للمرة الرابعة في تاريخه مع الأحمر، وعبر عن فرحته الكبيرة بعد الفوز على الترجي.
نشر أفشة حالة خاصة به عبر موقع التواصل الاجتماعي “انستجرام” :
“مفيش كلام أقوله أكثر من الحمد لله، كرم ربنا ملوش حد، 4 بطولات إفريقيا مع الاهلي، كنت فرحان بأول بطولة وبعد الرابعة لسه بقول فيه تاني،، ايه النادي الغريب ده، ايه الجمهور الغريب ده، كل اللي كان في بالي ان يارب الناس دي تروج مبسوطة، يارب الناس جايه من الصبح في الحر والشمس، يارب أسر وأطفال وكبار وحالات إنسانية، اللي من مطروح واسكندرية وأسوان، اللي بايت قدام الاستاد، ايه العظمه دي، جمهور الأهلي بيدي طاقة متتوصفش، شعورك وانت في الملعب مقفول كأنك طاير في السما، الأهلي نعمة كبيرة جدا، الأهلي هو التاريخ والمستقبل، شكرا يا أهلي على السعادة والفرحة,, مبروك يا رجالة، والله يسامحك يا عارضة”.
