طالبة أسيوط صاحبة الرقص فى حفل تخرجها: أنا خصيمة أي حد اتكلم عن عرضي وشرفي وهناك من استغل الحادث للتشهير بي
تصدرت طالبة من كلية تربية رياضية جامعة أسيوط التريند على وسائل التواصل الاجتماعي بعد انتشار فيديو لها وهي ترقص في حفل التخرج الخاص بدفعتها.
وظهرت الفتاة التي تدعى سمر عنتر في مقطع فيديو على صفحتها الشخصية بمنصة فيسبوك لترد على الهجوم الذي تعرضت له قائلة: أنا مش طالعة أبرر بس دي كانت حفلة تخرجي، وأنا طلعت رقصت عادي مفيهوش حاجة ملفتة، ما فيه ناس بترقص في الفرح هل الفرح يفرق عن حفلة التخرج؟
وتابعت: أنا فرحتي كانت فرحة عادي ومكنتش بعمل كده عشان أطلع ترند والكلام الفاضي ده، أنا كان حواليا أصحابي وأهلي وحبايبي، لكن الناس استغلت ده عشان يشهروا بيا، أنا طلعت رديت من بشاعة الكلام، أهلي عارفني كويس أوي وهما عارفين بنتهم بتعمل إيه مفيش حاجة في الخفاء، وإخواتي رجالة يسدوا عين الشمس ومش بعمل حاجة من وراهم خالص.
وقالت : أنا بتشرف بالكلية بتاعتي ودكاترتي بأي حق تغلطوا فيهم، أنا هاخد إجراءات قانونية ضد أي حد شهر بيا، والناس اللي فجأة عملوا شيوخ وحكموا عليا مش إنتو اللي هتقولولي الحرام والحلال إيه، كل شخص يركز في حياته وكفاية كلام بالباطل، وأنا خصيمة أي حد اتكلم عن عرضي وشرفي.
