ماجدة خير الله لـ"مصر تايمز": حكاية السعودية سحبت البساط من مصر في المسرح ده عبث

علقت الناقدة السينمائية الكبيرة ماجدة خير الله على الأزمة التي يواجهها مسرح الدولة خلال السنوات الأخيرة، واتجاه عدد كبير من النجوم لتقديم مسرحيات بالمملكة العربية السعودية، وهل المملكة العربية السعودية سحبت بساط المسرح من مصر مؤخرا. 

تعليق ماجدة خير الله على الأزمة الحقيقية لمسرح الدولة

قالت ماجدة خير الله في تصريحات خاصة لـ "مصر تايمز": "حكاية إن السعودية سحبت البساط من مصر في المسرح ده نوع من العبث، يعني مش علشان دولة تاريخها في الفن ميكملش سنة بتعمل عروض منقارنش بينها وبين دولة الفن فيها من أيام الفراعنة، يعني ميصحش إن احنا نهين نفسنا بهذا الشكل". 

وصرحت : "وإيه المشكلة إن النجوم يقدموا مسرحيات في السعودية، طب أيام نكسة 67 كل الاستوديوهات في مصر قفلت وكل الفنانين الكبار والصغيرين راحوا لبنان وزي ما راحوا زي ما جم وعملوا أفلام نص نص وربع ربع، ولما الدنيا رجعت للنشاط العادي كل ده جيه، وعملوا نهضة فنية زيادة عن اللي كانت موجودة، ف بلاش نقلل من نفسنا ونقول أصل ده سحب البساط والكلام الفارغ ده، كل ده علشان شوية عروض يعني". 

وأضافت: "وطبعا مسرح الدولة بيعاني من مشكلة، فيه أزمة مسرحية وأزمة سينمائية إنما ده مش معناه إن السعودية أو أي دولة تانية سحبت البساط، ف كلام فارغ يعني". 

وأوضحت :"عن الحلول التي يمكن أن تعيد مسرح الدولة إلى بريقه قائلة : إن يبقى فيه وعي يعني يكون فيه وعي في الإدارة، المسارح موجودة، وإن يبقى فيه تحديث للمسرح كشكل ويبقى فيه نصوص سواء عالمية أو حديثة، المهم يبقى فيه نشاط، وإعادة هيئات الثقافة، وإعادة كمان النشاط في الجامعات، لأن المسرح الجامعي أنتج ممثلين كبار كانوا موجودين على الساحة، على مدار 20\30 سنة كل اللي كانوا موجودين بدأوا من مسرح الجامعة". 

وتابعت: "لازم يبقى فيه عملية شاملة مش مثلا يحطوا ديكورات في مسرح معين وخلاص، المفروض الإدارة تبقى مختلفة، يبقى فيه حرية بمعنى إن الرقابة تدي حرية للنصوص الجديدة تبقى حاجة بالإضافة للتراث تكون حاجة بتتكلم في الواقع، بتتكلم عن مشاكلنا الراهنة، يبقى فيه تحديث لكل حاجة".