شهيرة لـ"مصر تايمز": محتاجين نهضة مسرحية زي زمان ومسرح الدولة بيعاني من قصور
علقت الفنانة الكبيرة شهيرة على الأزمة التي يواجهها مسرح الدولة خلال الفترة الأخيرة، وعن اتجاه عدد كبير من النجوم لتقديم عروض مسرحية بالخارج بالأخص في المملكة العربية السعودية، وعن الحلول التي ممكن تقديمها لإعادة مسرح الدولة إلى بريقه.
تعليق الفنانة شهيرة على أزمة مسرح الدولة
قالت الفنانة شهيرة في تصريحات خاصة لـ "مصر تايمز" : "طبعا مسرح الدولة بيعاني من قصور كبير، وإحنا محتاجين نهضة مسرحية زي زمان، والمشكلة إن احنا معندناش كتاب مسرح زي الأول يقدروا يعملولنا مسرحيات ذات قيمة تليق بالمسرح المصري، ده غير الميزانيات الضعيفة اللي بتتعمل للمهرجانات الخاصة بالمسرح أو المسرحيات اللي بتنتج، وطبعا ده علشان الظروف اللي فيها البلد، ولكن الأكيد إن إحنا محتاجين نهضة مسرحية جديدة لإن اللي حاصل ده مش قيمة المسرح المصري".
وعلقت على اتجاه عدد كبير من النجوم لتقديم عروض مسرحية بالمملكة العربية السعودية : "مفيهاش مشكلة ومش شايفة إنها حاجة عيب، ما يقدموا في أي مكان، هما ناس شغالة وبينتجوا مسرحيات وبيستعينوا بالفنانين المصريين وماله، المسرح في أي مكان وغير كدة السعودية بلد شقيق مش أعداء يعني".
وأضافت: "إحنا بقى نحاول نجذب النجوم اللي بيطلعوا برة نقدملهم الأعمال الجيدة والدعم المادي الكويس والفنانين هيجوا يعني مش هيقولوا لا".
وصرحت عن الحلول التي يمكن تقديمها لإعادة مسرح الدولة إلى بريقه: "أهم حاجة الكتابة وأهم حاجة الورق إن يكون فيه ورق جيد وكويس من كتاب مسرحيين على مستوى من الوعي والثقافة كبير بحيث يقدروا يقدموا حاجة للفن المسرحي والمسرحيين، ولازم يبقى فيه الكتاب لأن أهم حاجة الكلمة، وبعدين بعد كدة الميزانية اللي تنتج العمل ده في أبهى صورة ليه، والممثلين أهم بتوعنا وعندنا".
وأكدت: "أكيد منتظرة جديد من وزير الثقافة الجديد بخصوص المسرح لأن كل وزير لما يتولى مهامه هو هيحاول طبعا يقدم كل الصلاحيات والإمكانيات اللي تنفذ مسرح يليق بالمسرح المصري، أكيد كل وزير هيحب إنه يعمل شئ جديد للمسرح".
