إلهام شاهين لـ "مصر تايمز": محتاجين نعمل تحديثات للمسرح وحرية في اختيار الموضوعات
علقت الفنانة إلهام شاهين عن شعورها عند تقديمها للفنانة القديرة سميحة أيوب في افتتاح الدورة الـ 17 للمهرجان القومي للمسرح والتي تحمل اسمها، كما علقت أيضا على الأزمة التي يعاني منها مسرح الدولة، وكيفية إعادة مسرح الدولة إلى بريقه، كما كشفت أيضا عن رأيها في اتجاه عدد كبير من نجوم الفن لتقديم عروض مسرحية بالمملكة العربية السعودية.
تعليق إلهام شاهين على أزمة مسرح الدولة
قالت إلهام شاهين في تصريحات خاصة لـ "مصر تايمز": "أكيد مبسوطة جدا وفخورة إني قدمت سميحة أيوب، هي فنانة كبيرة وأستاذتي وأستاذتنا كلنا وأستاذة كل الجيل اللي موجود، وهي قدمت للمسرح كتير كممثلة وحتى كمان كمخرجة، فيه ناس متعرفش عنها إنها أخرجت للمسرح 4 أعمال مهمين، فهي قيمة كبيرة جدا وأنا كنت فخورة اوي إنهم اختاروني إن أنا أقدمها على المسرح في يوم تكريمها وفي دورة مهمة لأن عليها اسمها، ف أنا قولت إن دي أنا بعتبرها أهم الدورات عليها اسم أكبر نجمة في تاريخ المسرح".
وأضافت عن اتجاه عدد كبير من النجوم لتقديم مسرحيات في المملكة العربية السعودية : "طول عمرنا بنعرض لما يبقى عندنا عروض ناجحة كنا بنلف بيها الوطن العربي كله، أنا آخر مسرحية بهلول في إسطنبول قعدت 5 سنين على المسرح، تخللهم في النص سافرت عرضت في الكويت والإمارات وقطر ولبنان، أنا عرضت شهرين في لبنان، ف يعني ده عادي إن المسرح يبقى للوطن العربي كله".
وأوضحت: "دول نجوم مصريين ودي مسارح مصرية، ف مفيش مشكلة أهلا وسهلا، أهلا بيكم".
وعلقت عن الحلول التي يمكن تقديمها لإعادة مسرح الدولة إلى بريقه : "ندي حرية في اختيار المواضيع ومتبقاش الرقابة متشددة، يعني نهتم بتجهيز المسارح بشكل يعني دلوقتي التكنولوجيا ليها دور والشاشات، فيه تغيير كبير في المسارح في كل العالم، إحنا عايزين نجدد خشبة المسرح بكل التكنولوجيا الحديثة المتبعة في العالم كله، يعني نعمل شوية تحديثات وحرية في اختيار الموضوعات".
وأكدت: "إن المسرح الجامعي موجود ممشيش، وإن المسرح الجامعي نشيط لإن لسه كانوا طالبيني السنة دي في مهرجان المسرح الجامعي كانوا عايزيني في التحكيم، ف المسرح الجامعي موجود"
