ماجدة خير الله لـ "مصر تايمز" : مرتضى منصور رفع دعوى لسحب تراخيص "الملحد" عشان ياخد اللقطة

علقت الناقدة السينمائية الكبيرة ماجدة خير الله على الجدل المثار حول فيلم "الملحد" وذلك بعد قيام المستشار مرتضى منصور برفع دعوى قضائية لسحب تراخيص الفيلم قبل طرحه في دور العرض السينمائية بمصر. 

تعليق ماجدة خير الله على الدعوى القضائية التي رفعها مرتضى منصور ضد فيلم الملحد 

قالت ماجدة خير الله في تصريحات خاصة لـ "مصر تايمز" : "أي مصنف فني طالما أخد موافقة من الرقابة، ماهي الرقابة دي تابعة للدولة، يعني جهاز تابع للدولة ووزارة الثقافة، يعني إذا مينفعش إن أنت تيجي تطعن في قرار دولة". 

وأضافت : "ووزارة الثقافة بيبقى فيها جهات بتتابع الأعمال اللي ممكن تثير الجدل زي موضوع فيلم الملحد، ولو هتروح ترفع قضايا اعمل علشان تاخد لقطة وكدة". 

وصرحت : "والقضية لو اتأجلت مرة واتنين هيكون الفيلم خلص من السينما لأن أكيد مش هيبتوا من أول جلسة يعني، وطبعا مش هيحصل أي حاجة بس على ما يتاخد الحكم هيكون الفيلم اتشال من السينمات، حتى لو الفيلم عليه جدل، هو مش فيلم كوميدي أو فيلم أكشن، مش من الأفلام اللي تقعد في الصيف، ف هو يدوب هياخد 3 أو 4 أسابيع وبعد كدة هتلاقيه بيتباع لإحدى المنصات ومفيش مشكلة هيتشاف للناس اللي عايزة تشوفه". 

وأوضحت : "وبعدين هو فيلم الأفوكاتو اللي أستاذ مرتضى منصور عمل عليه حوار وقضية، هل الفيلم مبيتشافش، العمل الفني طالما طلع للنور تأكد إنه هيتواجد وهيتشاف بطرق مختلفة، حتى لو فيه مضايقات بعض الوقت لأي ظروف طارئة أو غير طارئة، ف تأكد إنه هيتشاف طالما إنه طلع". 

وتابعت : "الله أعلم بنية مرتضى منصور معنديش فكرة، بس أنا بقول النتائج المتوقعة من خلال فهمي لكيف تمرر الأفلام، طالما مر الفيلم من الرقابة وهي جهة حكومية يبقى فيه موافقة من الحكومة على تمرير الفيلم، لأنه الفيلم مكانش بيتصور فجأة كان معروف من سنتين أو 3 سنين، وحتى كان الله يرحمه مصطفى درويش قال لا أنا مش هعمل الفيلم، الفيلم أثار جدل من أول ما ابتدى تصوير، ف معروف يعني، مش اتعمل فجأة والناس اتفاجئت بيه واللي يقول أنا هوقفه والكلام ده في الواقع مش هيحصل أي حاجة". 

وأكملت : "هل ممكن واحد عاقل أو نص عاقل أو ربع عاقل يخش الفيلم مثلا يسئ للإسلام ويخش المسيحية أو العكس ؟، كلمة الخوف من إن يحصل كذة زي ما بيبقى فيه أفلام كتير بيتقال عليها إنها إساءة لمصر وإن الأجانب هيشوفوه، ده على أساس إن الأجانب هيسيبوا الأفلام الأجنبية ويتفرجوا على فيلم مصري يلاقوا فيه فساد ف لا منجيش مصر، لا ده كلام اللي عايز يقول أي كلام بيتعلل بأي تعليلات وخلاص"