أحمد السقا يكشف عن صفع والده له لأول مرة

حل الليلة النجم الكبير أحمد السقا ضيفا ببرنامج "بيت السعد" مع الفنانين عمرو سعد وأحمد سعد والذي يعرض مساء كل يوم أربعاء على قناة "MBC 1" في تمام الساعة الـ 11 مساء، حيث من المقرر أن يكشف السقا خلال اللقاء العديد من التفاصيل في حياته الشخصية وحياته العملية.

حلقة أحمد السقا ببرنامج بيت السعد 

كشف أحمد السقا عن أول موقف جعل والده المخرج الراحل صلاح السقا يصفعه على وجهه لأول مرة قائلا: "علشان أنا شديت مع والدتي شوية واحنا في الدور الرابع أو الخامس وكان تحتنا أرض فاضية، قمت واقف عند الشباك وقولتلها اللي هيجي نحيتي هرمي نفسي من هنا، وساعتها كنت في تانية معهد". 

وأضاف: "لقيت أمي بتنده بابا الله يرحمه، ف أنا كنت بتكلم فرنساوي سماعي مش اتعلمته يعني، من كتر ما أبويا وأمي بيتكلموا فرنساوي لما ميحبونيش أفهم حاجة، وأبويا كان بيتكلم 6 لغات". 

وتابع : "لقيتها بتندهله واتكلموا كلمتين فرنساوي وأنا واقف بقى عز الدين أيبك اللي جوايا خرج، ف راح بصلي كدة وقالي نط، هو أنت مش قولت هتنط، هعتبر إن أنا مخلفتش غير أختك، نط ياض، وأنا وأبويا كنا صحاب جدا، فضل يقرب مني لحد ما شدني من البنطلون وبعد كدة قلم، أنا عندي ودن لغاية دلوقتي سمعي تقل لأن أبويا كان بيلعب ملاكمة وهو صغير، كانت إيده تقيلة الله يرحمه، ف بصيت كدة اتضايقت لأن أبويا صاحبي يعني".

وصرح: "بعدها كام يوم دخل عليا الأوضة وكنت مكتئب جدا اللي هو مش مصدق أصلا، ف لقيته قالي مضربتكش علشان زعقت لماما، أنا عارف إنك متربي، أنا ضربتك علشان قولت أنا هنط ومنطيتش". 

برنامج بيت السعد 

نشرت قناة "MBC 1" برومو الحلقة في وقت سابق على الصفحة الرسمية عبر موقع تبادل الصور والفيديوهات "إنستجرام": "أحمد السقا ضيفنا الأربعاء المقبل في بيت السعد .. 11 مساء بتوقيت السعودية".

برنامج "بيت السعد" يقدمه الفنان عمرو سعد وشقيقه أحمد سعد، عبر قناة MBC الفضائية، وتعرض حلقة كل يوم أربعاء، وشهدت الحلقة الأولى استضافة الفنان أحمد حلمي، ويعد البرنامج من إخراج محمد سامي.