أحمد أمين يكشف تفاصيل جديدة عن مهرجان نبتة للأطفال

كشف الفنان أحمد أمين عدة تفاصيل عن مهرجان نبتة للأطفال الذي يرأسه وذلك عندما نشر فيديو على الصفحة الرسمية للمهرجان عبر موقع التواصل الاجتماعي "فيسبوك". 

تفاصيل مهرجان نبتة للأطفال 

وعلق أحمد أمين قائلا: "أخيرا أقدر أقولكم أهلا بيكم في نبتة، عارفين لما حد يحلم حلم جميل وبعدين يصحى من النوم لقاه اتحقق ف بيبقى متلخبط ومبسوط في نفس الوقت ومخضوض، أهي نبتة دلوقتي عاملة كدة، ده حلم فيه فريق كبير بيحلم بيه وفيه جزء منه ابتدا يتحقق دلوقتي". 

وأضاف: "مهرجان نبتة هو أول خطوة للحلم ده اللي احنا بنحاول نرسمه لأولادنا بأحسن طريقة ممكنة على قد ما نقدر، وطبعا أنا جاتلي أسئلة كتير عن نبتة وعن المهرجان، وأحب أعرفكم بكيكو صاحبنا اللي هيكون معانا في المهرجان كشعار للمهرجان وكشعار لنبتة، أبو قردان الشقي الجميل اللي بياخد باله من أي نبتة في الدنيا، الطائر المصري الأصيل، لكن كيكو بتاعنا مش بس طائر مصري أصيل ولكن عنده فضول رهيب تجاه إنه يعرف كل حاجة ويطير ويلف ويجمع معلومات". 

وكشف: "نبتة هي شركة أحد شركات المتحدة مختصة بدعم وصناعة وتمويل وإنتاج أعمال للأطفال بكل أشكالها وكل أنواع المحتوى اللي ممكن يقدم للطفل من أول المسرح للسينما للبرامج للأنيميشن وكل الأشكال، مهرجان نبتة هو عبارة عن ملتقى للصناع وملتقى للأطفال مع صناع محتوى الأطفال علشان نبقى بداية وإعلان وفي نفس الوقت يبقى مسابقة لإنتاج محتوى للأطفال، والمسابقة معمولة للكبار اللي بيقدموا المحتوى للأطفال". 

وأوضح : "أما عن فعاليات المهرجان إن شاء الله هيكون يوم 15 أغسطس وهيبقى إن شاء الله هيكون حاجة مختلفة هنحبها كلنا، ورشة وقت الحكاية هي ورشة هتبدأ يوم 16 أغسطس، وبشركة مجموعة من الفنانين منهم أساتذتي وزملائي أستاذة سوسن بدر والكوميديان الجميل حاتم صلاح والكاتب الجميل عبد الرحمن جاويش وأنا هكون مشارك معاهم في الورشة دي هحاول أقوم بأي دور مفيد جنب الناس الجامدة اوي دي". 

وكشف: "ويوم 17 أغسطس ورشة الستوب موشن وهو فن صناعة التحريك عن طريق المجسمات وتحديدا في الورشة دي باستخدام الصلصال وهيقدمها الفنان المخرج حازم جودة وهيشارك فيها الأطفال وهنعمل منتج أنيميشن صغير بحيث يعرفوا يعني إيه أنيميشن ويعني إيه تحريك ويعني إيه كرتون". 

وأكمل: "ويوم 18 أغسطس ورشة الرائد الصغير، الورشة دي دورها تعلم ولادنا يعني إيه ريادة أعمال ويعني إيه بيزنس بس بشكل مبسط، ويعني إيه أعمل مشروع صغير وده بالتعاون مع شركة إنطلاق إن شاء الله ده يوم 18 أغسطس ودي هتكون فعاليات المهرجان".